Heimildarmyndin Queen of the World er væntanleg á HBO, en myndin fjallar, eins og nafnið gefur til kynna, um Elísabetu Bretadrottningu.
Í myndinni er meðal annars rætt við konunglega kokkinn Mark Flanagan þar sem hann ljóstrar því upp að karabískur matur sé afar vinsæll hjá drottningunni, þá sérstaklega svokölluð „callaloo“ súpa. Sagt er frá þessu á heimsíðu fréttamiðilsins Express.
Því finnst okkur tilvalið að deila uppskrift að þessari frægu súpu, en þar sem við búum ekki svo vel að geta gætt okkur á sama káli og er notað í súpuna við Karabíska hafið notum við spínat í staðinn.
Hráefni:
1 laukur, saxaður
2 hvítlauksgeirar, saxaðir
smá bútur engifer, saxað
1 sæt kartafla, afhýdd og skorin í teninga
2 jalapeno, saxaðir
6 sneiðar eldað beikon
4 bollar spínat, saxað
3 bollar vatn eða kjúklingasoð
safi úr 2 súraldinum
1 bolli kóríander, saxað
1 msk allrahanda
1 msk túrmerik
salt og pipar
2 bollar okra eða eggaldin, skorið niður
Aðferð:
Hitið olíu í stórum súpupotti og svissið síðan lauk, hvítlauk, beikon, jalapeno og engifer. Bætið sætu kartöflunni við og eldið í 2 til 3 mínútur. Bætið kryddunum saman við og eldið í mínútu til viðbótar. Bætið vatni eða soði út í og náið upp suðu í súpunni. Bætið spínati og okra/eggaldin saman við. Látið malla í 15 mínútur og bætið síðan súraldinsafa og kóríander saman við. Smakkið til og kryddið eftir smekk. Eldið súpuna þar sem kartaflan er orðin mjúk. Maukið þá súpuna með töfrasprota eða hellið herlegheitunum í blandara. Smakkið aftur til og berið fram, jafnvel með ferskum kóríander.
