Franskar pönnukökur, eða crepes, eru afskaplega góðar og hægt að fylla þær með hverju sem er. Hér er mjög einföld uppskrift að pönnukökunum sem einfaldlega eru fylltar með ferskum ávöxtum og berjum og síðan dustaðar með flórsykri.
Hráefni:
1 bolli hveiti
2 stór egg
1 msk. sykur
1/4 tsk. salt
1 1/2 bolli nýmjólk
1 msk. smjör
ferskir ávextir og ber
flórsykur
Aðferð:
Setjið hveiti í stóra skál og þeytið eggjunum síðan varlega saman við. Bætið sykri og salti saman við og hrærið. Hrærið mjólkinni smátt og smátt saman við og þeytið á meðan þið blandið henni saman við deigið. Látið deigið sitja við stofuhita í um það bil tuttugu mínútur, eða þar til toppurinn freyðir. Bræðið smjörið í lítilli pönnu, eða pönnukökupönnu, yfir meðalhita. Setjið um það bil 1/4 bolla af deigi á pönnuna í einu og veltið deiginu um pönnuna til að hylja hana, líkt og um pönnukökubakstur væri að ræða. Steikið í 2 mínútur, snúið síðan við og steikið í 1 mínútu á hinni hliðinni. Endurtakið með restina af deiginu. Fyllið með ferskum ávöxtum og dustið með flórsykri áður en þið berið fram.
