Bogi Ágústsson, blaðamaður á Ríkisútvarpinu, hefur starfað við fréttaflutning í tæp 50 ár. Hann hefur starfað hjá Ríkisútvarpinu síðan á áttunda áratug síðustu aldar og óhætt að segja að hann sé reglulegur gestur á heimilum landsmanna. Áríð 1988 varð hann fréttastjóri og gegndi starfinu til ársins 2003. Þá tók hann við starfi forstöðumanns fréttasviðs Ríkisútvarpsins, en lét af því starfi við skipulagsbreytingar 2007. Í dag les hann fréttir í Sjónvarpi og er með reglulegar innkomur í Heimsgluggann á Rás 1.
Bogi sem hóf feril sinn í sjónvarpi þegar útsendingar voru ennþá í svarthvítu hefur fylgt takti fréttaflutnings í gegnum ýmsar breytingar. Á þessum tíma hafa dagblöð nánast lagst af, netmiðlar komið inn og tekið meira pláss á meðan sjónvarp þróast hratt en útvarp heldur velli. Bogi er gestur Einars Bárðarsonar í nýjasta þættinum af Einmitt þar sem þeir ræða þessa þróun, hápunktanna á 50 ára ferli og KR jakkann eins og félagar hans kallar tvíhneppta blazerjakkann hans Boga.
„Það hefur enginn orðið ríkur á því að reka fjölmiðla á Íslandi, það er dýrt, þó það hafi orðið ódýrara að mörgu leiti, þá er það dýrt að halda úti fjölmiðli á Íslandi,“ segir Bogi. Dagblöðin hafa þurrkast úr hvert af öðru nema eitt.
„Morgunblaðið, því hefur verið haldið á lofti af stórútgerðinni á Íslandi. Morgunblaðið var „defacto“ gjaldþrota eins og margir fjölmiðlar, en því er haldið á lofti með styrkjum og það sama má segja um fleiri fjölmiðla. Þetta er mikill barningur að halda úti fjölmiðli.
Bogi segir það vera umhugsunarefni að fréttamaður Guardian sem var staðsettur í Rússlandi í uppgangi Pútín í 12 ár en sé núna staðsettur í Bandaríkjunum að fylgjast með gangi mála segi margt minna hann á tíma hans í Rússlandi.
„Hann er að segja, ég sé sum af sömu merkjum og ég sá þegar að breytingarnar voru að byrja í Rússlandi. Ég sé þessar tilhneigingar í dag í Bandaríkjunum segir hann, segir Bogi sem sjálfur geldur óhug við mörgu af því sem hann sér til Trump stjórnarinnar í Bandaríkjunum í dag.
Talið berst að fréttamyndum af nýlegum ríkistjórnarfundi í Hvíta Húsinu.
„Þetta er eins og trúarsamkoma, ráðherrarnir byrja á því að dýrka leiðtogann. Thank you mister president, you have done so well for the nation and eventually for the world, segja þeir hver á fætur fætum öðrum. Þetta vakti mikinn óhug,“ segir Bogi. „Og það að Hvíta Húsið skuli útiloka ákveðna fréttamiðla, það er skelfilegt.“
Á tæpum fimmtíu ára ferli er margir hápunktar og á þessum sama tíma færist fréttaflutningurinn meira og meira nær rauntíma. Á síðustu áratugum hafa margar fréttir verið fluttar þannig að í upphafi fréttaútsendinganna séu atburðirnir ennþá í gangi.
„Þannig var það 11. september 2001 í árásinni á tvíburaturnana að við fórum í loftið vitandi afskaplega takmarkað hvað var í gangi,“ segir Bogi. „Við fórum tiltölulega hratt í loftið og við þurftum bara að viðurkenna það að við vorum að flytja þeim fréttir um leið og þær gerast og um leið og þær berast.“
Erfiðustu fréttirnir á þessum fimm áratugum segir Bogi hafa verið snjóflóðin fyrir vestan á tíunda áratugnum.
„Það eru án efa sjóflóðin á Súðavík og Flateyri. Ég fór sjálfur ekki á staðinn, ég var í stúdíóinu en að tala við fólk, eins og maður sem kom til okkar sem hafði misst þrjú börn og að lesa upp lista með nöfnum þeirra sem fórust. Ég á ennþá erfitt með að rifja þetta upp.“
Samtal þeirra Einars og Boga má heyra í heild sinni hér.
