Taílensk kona, Wilawan Emsawat, 35 ára, hefur verið handtekin vegna gruns um að hafa táldregið nokkra háttsetta búddamunka og notað síðan myndbandsupptökur af ástarfundunum til að kúga fé út úr þeim, næstum 1,5 milljarð króna. Peningum sem Emsawat er sögð hafa spreðað í gjálífi og veðmál.

Málið hefur vakið mikla athygli en það komst í hámæli þegar virtur virtur munkur, Phra Thep Wachirapamok,  yfirgaf klaustur sitt í Bangkok skyndilega og hvarf. Fljótlega kom í ljós að hann hafði átt í leynilegu ástarsambandi við Emsawat, sem sagðist vera barnshafandi og krafðist hárrar þöggunargreiðslu. Þegar hann neitaði, sendi hún gögnin áfram innan klaustursins og munkurinn flúði í kjölfarið, heltekinn af skömm.

Lögreglan gerði húsleit hjá Emsawat og fann þar fimm síma með gríðarlegu magni  af viðkvæmu efni, meðal annars myndefni þar sem hún sést með öðrum háttsettum munkum og jafnvel stjórnmálamönnum.

Í viðtali við taílenska fjölmiðla viðurkenndi Emsawat að hafa átt í sambandi við tvo munka og einn trúarprófessor. Hún hafi einnig þegið dýrar gjafir – þar á meðal Mercedes-Benz og háar upphæðir inn á bankareikning sinn.

Lögreglan rannsakar nú fleiri klaustur, en talið er að minnsta kosti níu munkar hafi orðið fyrir barðinu á hinu meinta tálkvendi

Málið  er eitt af mörgum hneykslismálum sem hefur dunið yfir búddistareglur í Tælandi undanfarin ár. Yfirvöld íhuga nú að endurskoða reglur og taka upp háar sektir og jafnvel fangelsisdóma fyrir munka sem brjóta gegn heitum sínum.