Svo gæti farið að hraunrennsli nái Reykjanesbraut á innan við einum degi, jafnvel enn skemmri tíma, í næsta eldgosi á Reykjanesskaga. Þetta er miðað við þær forsendur að það gjósi á svipuðum slóðum og gígarnir sem voru lengst virkir í nýafstöðnu eldgosi.

Þorvaldur Þórðarson, prófessor og eldfjallafræðingur, segir þetta í samtali við Morgunblaðið í dag. Hann segir að vissulega sé um ólíklega sviðsmynd að ræða en möguleikinn sé engu að síður til staðar.

„Við get­um ekki full­yrt hvort gosstöðvarn­ar eru að fær­ast norðar, en það eru vís­bend­ing­ar um að virkn­in sé að fær­ast norður fyr­ir vatna­skil. Ef gossprung­an opn­ast á svipuðum slóðum og gíg­arn­ir sem voru virk­ir sem lengst í síðasta gosi, þá er greið leið fyr­ir hraun­rennslið niður að Reykja­nes­braut. Nýja hraunið auðveld­ar flæði á hraun­rennsl­inu í þessa átt, gjósi næst á þess­um slóðum. Verstu sviðsmynd­ir sýna að hraun­rennsli geti náð Reykja­nes­braut á inn­an við ein­um degi eða jafn­vel skemmri tíma,“ segir Þorvaldur við Morgunblaðið.

Hann segir að viðbragðsaðilar þurfi að hugsa fyrir því hvernig koma eigi umferð til Keflavíkurflugvallar ef allt fer á versta veg. Bendir hann á að leiðin í gegnum Grindavík sé ekki góð og Reykjavíkurflugvöllur beri ekki þá umferð sem fer um Keflavík.

„Þetta er stórt mál og stór­ar spurn­ing­ar sem tengj­ast þessu, sem hef­ur ekki verið svarað enn þá þannig að hægt sé að taka ákv­arðanir um hvernig bregðast eigi við,“ segir hann við Morgunblaðið í dag.