Hjónin Anna Margrét Magnúsdóttir og Magnús Hlynur Hreiðarsson fréttamaður lentu í óhugnanlegu atviki í umferðinni í gær og óska eftir því að ná tala af vörubílstjóra sem þar átti í hlut.

„Kæri vörubílstjóri! sem við mættum á Suðurlandsveginum á leið okkar til Reykjavíkur um kl 12.45 í dag (8/11/2024) þegar við keyrðum upp úr „dældinni“ við Skíðaskálann í Hveradölum!!! Viltu vera svo vænn og hugrakkur að setja þig í samband við okkur. Um leið og við mættum þér féll að palli þínum, á ógnarhraða, stærðarinnar, að því að okkur sýndist, einhverskonar brúsi, sem skall á bílnum okkar og sprakk,“ segir Anna Margrét á Facebook-síðu sinni en hún veitti DV góðfúslega leyfi til að greina frá efni færslunnar.

Anna Margrét segir í samtali við DV að mikilvægt sé að vekja athygli á atvikinu svo slíkt endurtaki sig ekki.

Hún skýrir frá því í færslu sinni að þau hafi verið á vinstri akrein með bíl við hlið sér hægra megin og vegrið á vinsri hönd. Þau sáu því ekki bílnúmer vörubílsins og gátu ekki stöðvað sökum umferðar og aðstæðna.

Hún segir síðan:

„Við þökkum Guði fyrir það að þetta flykki hafi ekki lent á framrúðu bílsins, með ófyrirsjáanlegum afleiðingum. Örugglega hefði það endað töluvert illa, bæði fyrir okkur sjálf og þá sem í kringum okkur voru.

Tjónið er samt sem áður töluvert, auðvitað ætlar ekki nokkur maður að verða valdur af svona löguðu og þess vegna biðjum við til þess sem málið varðar, eða þeirra sem til sáu, ef einhverjir voru, að hafa samband við okkur.“

Vörubílstjórinn sem í hlut átti er eindregið hvattur til að hafa samband við Önnu Margréti með einkaskilaboðum í gegnum Facebook-síðu hennar.