Samtökin ISTA, hafa haldið námskeið sín í kynlífs og shamanisma á Sólheimum í Grímsnesi undanfarin ár. Í eitt skipti var lögregla kölluð til á staðinn vegna nektar og notkunar hugbreytandi efna. Framkvæmdastjóri segist ekki vera rólegur yfir starfseminni og að Sólheimar vilji ekki tengjast neinu vafasömu.
„Ég hef ekki orðið var við neitt svona hér og þau segja mér að það sé ekki. Ekkert ofbeldi eða neitt slíkt í gangi. Ég hef tekið það trúanlegt hingað til,“ segir Kristinn Ólafsson, framkvæmdastjóri Sólheima sem hefur leigt samtökunum aðstöðu. „En ég veit náttúrulega ekkert hvað fram fer á þessum námskeiðum. Það veit það í rauninni enginn nema þau.“
DV fjallaði um ISTA, eða International School of Temple Arts, um síðustu helgi. Samtökin halda námskeið víða um heim, meðal annars hér á landi, í kynlífi og shamanisma.
Leiðbeinendur hjá ISTA hafa verið sakaðir um kynferðislega misnotkun og jafn vel nauðganir. Fyrsta „musteri“ samtakanna var leyst upp af lögreglunni í Phoenix sem sagði að það væri vændishringur dulbúinn sem trúfélag.
Þá hafa iðkendur lýst því að dýrum, svo sem kanínum, hafi verið fórnað á framhaldsnámskeiðum ISTA og hjörtun úr þeim étin.
Á erlendri heimasíðu samtakanna er öllum ásökunum hafnað. Segja þau aflífun dýra á námskeiðum ekki vera fórn heldur fá fólk til að skilja tengsl við kjötát. Einnig að kynlífsathafnir á milli leiðbeinanda og nemenda hafi verið tímabundið bannaðar.
ISTA hefur haldið leigt aðstöðu fyrir námskeið sín á Sólheimum í nokkur ár. Samkvæmt heimildum DV var lögregla tilkölluð á staðinn fyrir nokkrum árum síðan eftir uppákomu þar sem fólk á námskeiðinu var að strípast um og undir áhrifum hugbreytandi efna.
Að mati heimildarmanna DV ættu Sólheimar ekki að tengjast slíkum uppákomum. Enda er staðurinn þekktur sem sjálfbært athvarf fyrir fólk sem er margt hvert andlega fatlað. En ISTA borgi vel fyrir gistingu og aðgang að salnum í Sesseljuhúsi og mötuneyti.
Kristinn hefur verið framkvæmdastjóri Sólheima síðan í maí 2023 og var rekstarstjóri frá janúar það ár. Hann segir að lögreglan hafi ekki haft afskipti af starfseminni í hans tíð.
Aðspurður segir hann engar formlegar reglur vera um þá starfsemi sem megi vera hjá leigjendum á Sólheimum. Líkir hann þessu við hótel, sem eðlilega geti ekki borið ábyrgð á öllu sem fram fari á hótelherbergi. Heilt yfir sé ekki hægt að setja miklar hömlur á hvað fólk geri þar.
„Við viljum hins vegar ekki verið tengd við neitt vafasamt. Það er orðsporsáhætta fólgin í því sem við kærum okkur ekki um,“ segir Kristinn. „Sólheimar hafa yfirbragð kærleika og manngæsku. Ef það er eitthvað annað þá viljum við ekki koma nálægt því. Ég er ekkert rólegur yfir þessu. Ég ætla mér að tala við þau aftur.“
