Reynir Traustason, ritstjóri Mannlífs, gerði meinleg mistök í pistli sem birtist á vefsíðu fjölmiðilsins á sunnudaginn. Um var að ræða svokallaðan „orðróm“ sem Reynir heldur úti en í umræddum pistli greinir hann frá því að Snorri Másson, oddviti Miðflokksins í Reykjavík suður, hafi verið púaður niður af sviði á herrakvöldi á Selfossi um sömu helgi.

Hafi Miðflokksmaðurinn átt að mæta þar til að halda skemmtiræðu en gestum þótt orðavaðallinn of pólitískur og meðal annars hrópað: „Er þetta einhver helvítis kosningafundur?“

Eitthvað fát hefur hins vegar verið á Reyni því auk pistilsins birti hann um stundarsakir messenger-samskipti sín við heimildarmanninn, Karen K, sem mun vera almannatengillinn Karen Kjartansdóttir. Reynir á að hafa vitað til þess að hún hafi haft upplýsingar um hvað gekk á og fengið þaðan efnivið í pistilinn. Samskiptin voru sýnileg á vef Mannlífs í stutta stund en þó nægilega lengi til að netverji tók skjáskot sem síðan fór á flug.

Vísir fjallaði um málið nú fyrir stundu en þar er haft eftir Snorra að hann kannist ekki við hafa verið púaður niður af sviðinu. Hins vegar hafi einhverjir Framsóknarmenn í salnum verið sárir yfir málflutningi hans og erfi hann það ekki við þá. Undir þau orð tekur veitingamaðurinn Tómas Þóroddsson, sem stóð fyrir kvöldinu. Snorri hafi að hans sögn klárað ræðu sína en eitthvað hafi þó borið á frammíköllum.