Halla Tómasdóttir og Katrín Jakobsdóttir báru höfuð og herðar yfir aðra frambjóðendur í forsetakappræðum RÚV á föstudagskvöldið. Þetta er álit lesenda DV í netkosningu sem staðið hefur yfir undanfarinn sólarhring. Tæplega 22 þúsund atkvæði bárust frá lesendum og hlutu Halla og Katrín um 5600 atkvæði á mann en Halla var sjónarmun á undan.
Sjá einnig: Hér geta lesendur kynnt sér niðurstöður skoðanakönnunarinnar
Halla hefur átt undir högg að sækja í skoðanakönnunum undanfarnar vikur og ekki náð því flugi sem hún náði í forsetakosningunum árið 2016 þegar sagt var að hún hefði þurft 1-2 vikur í viðbót til að hrifsa forsetaembættið úr greipum Guðna Th. Jóhannessonar. Greinilegt er að frammistaðan á RÚV féll vel í kramið hjá lesendum. Stutt og hnitmiðuð svör og sjarmerandi framkoma en fróðlegt verður að sjá hvort að hún muni uppskera eftir því í komandi skoðanakönnunum.
Frammistaða Katrínar féll einnig vel í kramið og segja má að það hafi komið fáum á óvart enda alvön slíkum vettvangi úr pólitíkinni,
Baldur Þórhallsson var í þriðja sæti, að mati lesenda, með rétt tæplega þrjú þúsund atkvæði og Halla Hrund Logadóttir varð fjórða með rétt tæplega 2.500 atkvæði.
Arnar Þór Jónsson varð í fimmta sæti með rúm 1.700 atkvæði en Jón Gnarr varð aðeins sjötti með rétt rúmlega 1.500 atkvæði. Það er eflaust áhyggjuefni fyrir Jón sem hefur verið að dala í skoðanakönnunum en fyrirfram var búist við því að hann yrði á heimavelli á þessum vettvangi og gæti unnið á.
Sjá einnig: Þetta höfðu netverjar að segja um kappræðurnar á RÚV
Óvæntasta stjarna kvöldsins var þó eflaust Viktor Traustason sem átti nokkur frábær augnablik í kappræðunum en tæplega 750 lesendur, um 3,5%, töldu að hann hefði skarað fram úr öðrum þetta föstudagskvöld. Þá má Ásdís Rán einnig vel við una með tæplega 550 atkvæði og rétt rúmlega 2,5%.