Prófessor í eldfjallafræði við Uppsala-háskóla í Svíþjóð segir að það geti skipti máli hvort hraunið úr gosinu við Sundhnúksgíga verður mjög fljótandi eða í fastara formi. Þetta geti skipt máli varðandi það hversu vel varnargarðarnir við Svartsengi halda verði þeir fyrir hraunstreymi.

Þetta kemur fram í umfjöllun Aftonbladet.

Þess misskilnings virðist þó gæta í fréttinni að varnargarðar hafi einnig verið reistir við Grindavík.

Rætt er við Valentin Troll, prófessor í eldfjallafræði við Uppsala-háskóla. Hann segist vera í góðu sambandi við íslensk starfssystkini sín.

Eins og er flæðir mest af hrauninu í norður og austur en ekki í átt að Grindavík eða Svartsengi og eins og íslenskir vísindamenn segir Troll að það geti breyst.

Hann segir að ef hraunið sé alveg fljótandi þá muni varnargarðarnir gagnast vel en ef það verði meira klístrað og kekkjóttara og þar með í fastara formi sé raunveruleg hætta á því að það flæði yfir varnargarðana. Troll segir hins vegar að eins og staðan sé núna sé hraunið vel fljótandi og því auðveldara að hafa stjórn á því.

Troll og aðrir vísindamenn í Svíþjóð sem rætt er við segja líklegt að gosið muni taka í mesta lagi 2 vikur og hafa það eftir íslenskum kollegum sínum en taka undir með þeim að það sé erfitt að spá fyrir um það með mikilli vissu.