Olís hefur undirritað viljayfirlýsingu við Landsvirkjun og Linde um samstarf í uppbyggingu virðiskeðju græns vetnis á Íslandi. Markmiðið er að gera vetni að raunhæfum kosti í samgöngum á Íslandi, ekki síst er varðar vörudreifingu, þungaflutninga og stærri farartæki, þar sem bein rafvæðing hentar síður, eins og segir í tilkynningu.
Olís hefur ávallt lagt ríka áherslu á umhverfismál og jafnt og þétt tekið ný græn skref í átt að umhverfisvænni orkugjöfum. Með undirritun á viljayfirlýsingu við Landsvirkjun og Linde tekur Olís þátt í að stuðla að bættri uppbyggingu á virðiskeðju vetnis á Íslandi, allt frá framleiðslu til notenda. Olís mun sýna vilja í verki og taka virkan þátt í flutningi vetnis, áfyllingu þess og smásölu og þannig leggja sitt af mörkum í baráttunni við loftlagsbreytingar. ,,Olís hefur ávallt verið í fararbroddi þegar kemur að nýtingu endurnýjanlegra orkugjafa. Að taka þátt í þessu verkefni með Landsvirkjun og Linde er í senn mikilvægt og spennandi skref til framþróunar í orkuskiptum á Íslandi. Olís sér vetni og rafeldsneyti sem mikilvæga orkugjafa til framtíðar fyrir viðskiptavini sína,“ segir Stefán Karl Segatta, sviðstjóri fyrirtækjasviðs Olís.