Alls bárust 11 beiðnir um leit að börnum og ungmennum í desember á höfuðborgarsvæðinu. Þetta kemur fram í mánaðarskýrslu Lögreglunnar á höfuðborgarsvæðinu um afbrotatölfræði fyrir desembermánuð.
Segir í samantekt um skýrsluna að hegningarlagabrotum á höfuðborgarsvæðinu hafa fækkað töluvert í desember en þau voru alls 559.
Tilkynningum um þjófnaði fækkaði á milli mánaða. Alls barst 51 tilkynning um innbrot í desember miðað við 85 tilkynningar í nóvember.
Alls bárust 118 tilkynningar um ofbeldisbrot. Skráðar tilkynningar um heimilisofbeldi voru 67 í desember og fjölgaði þessum tilkynningum á milli mánaða.
Í mánuðinum voru skráðar 107 tilkynningar um eignaspjöll og 21 tilkynning um stuld á bílum eða öðrum vélknúnum ökutækjum.
Skráðum fíkniefnabrotum fækkaði á milli mánaða og var eitt stórfellt fíkniefnabrot skráð í desember. Tilkynningum þar sem ökumaður var grunaður um akstur undir áhrifum ávana- og fíkniefna fjölgaði á milli mánaða en tilkynningum þar sem ökumaður var grunaður um ölvun við akstur fækkaði.
Skráð voru 569 umferðarlagabrot, að hraðamyndavélum undanskilum.
Skýrsluna má lesa hér.
