Samkvæmt nýja listanum þá er McCain óheimilt að koma nokkru sinni til Rússlands. En hann er ekki sá eini, sem er farinn yfir móðuna miklu, sem er á listanum því þar er einnig að finna nöfn Harry M. Reid, fyrrum öldungadeildarþingmanns, sem lést í desember 2021 og Orrin G. Hatch, fyrrum öldungadeildarþingmanns, sem lést í apríl á þessu ári.
The Washington Post skýrir frá þessu. Fram kemur að rússneska utanríkisráðuneytið hafi birt listann á laugardaginn. Á honum eru nöfn tæplega 1.000 Bandaríkjamanna sem Rússar beita nú refsiaðgerðum.
Í mars voru Joe Biden, forseti, og Kamala Harris, varaforseti, sett á bannlista Rússa og mega ekki koma til Rússlands og það sama gildir um aðra í ríkisstjórn Biden.
Á nýja listanum eru ekki bara nöfn stjórnmálamanna því þar eru til dæmis leikararnir Morgan Freeman og Rob Reiner. Einnig eru nöfn margra blaðamanna, dómara og yfirmanna tæknifyrirtækja á listanum.
En það vekur athygli að nafn Donald Trump, fyrrum Bandaríkjaforseta, er ekki að finna á listum Rússa. Samband hans og Vladímír Pútíns, Rússlandsforseta, var mun betra en samband Pútíns og Biden en Biden hefur ekki vandað Pútín kveðjurnar.
Nafn Mitch McConnell, leiðtoga Repúblikana í öldungadeildinni, er heldur ekki á listum Rússa.
John McCain verður væntanlega ekki fyrir miklum áhrifum af refsiaðgerðunum en hann var einnig beittur refsiaðgerðum af Rússum 2014 og þá sagði hann það vera heiður: „Ég gæti ekki verið stoltari,“ sagði hann í yfirlýsingu þá að sögn Politico.
Á Twitter skrifaði hann: „Þetta þýðir væntanlega að vorfríinu mínu í Síberíu er aflýst, að ég hef tapað hlutabréfum mínum í Gazprom, og að búið er að frysta leynilega bankareikninginn minn í Moskvu,“ skrifaði hann háðslega á Twitter.
I guess this means my spring break in Siberia is off, Gazprom stock is lost & secret bank account in Moscow is frozen http://t.co/TgwZneD4HY
— John McCain (@SenJohnMcCain) March 20, 2014