Það sem af er ári hafa að minnsta kosti 15 rússneskir auðjöfrar og áhrifamenn, þar á meðal olígarkar, látist við dularfullar kringumstæður. Svo ótrúlegt sem það er, þá hafa margir þeirra dottið og látist í kjölfarið.

Nú hefur enn eitt nafnið bæst við þennan lista, sem er orðinn nokkuð langur, en það er nafn milljarðamæringsins Pavel Antov. Hann er sagður hafa dottið út um glugga á þriðju hæð lúxushótels á Indlandi. Hann hafði gagnrýnt hernað Rússa í Úkraínu.

The Telegraph skýrir frá þessu og segir að Antov hafi verið staddur á Indlandi til að halda upp á 66 ára afmælið sitt.

Það gerir málið enn dularfyllra að fyrir nokkrum dögum, þann 22. desember, lést vinur hans, Vladimir Bidenov, á sama hóteli. Hann og Antov voru saman á ferð. Bidenov fannst látinn í herbergi sínu og var fjöldi tómra áfengisflaskna við hlið hans.

Indverska lögreglan segir að ekki sé talið að andlát þeirra félaga hafi borið að með saknæmum hætti en margir hafa efasemdir um að það sé rétt mat hjá lögreglunni. Ekki síst í ljósi fjölda andláta rússneskra olígarka og áhrifamanna síðustu mánuði.

Antov auðgaðist á pylsuframleiðslu og hann þekkti Pútín að sögn og var félagi í stjórnmálaflokki hans. En samband þeirra versnaði í júlí þegar Antov gagnrýndi flugskeytaárásir Rússa á Kyiv og sagði þær vera hryðjuverk.

Hann dró síðar í land og baðst afsökunar á ummælunum, sem voru birt á WhatsApp, og sagði að einhverjir aðrir hefðu staðið á bak við þau.