Hallur Gunnar Erlingsson, fyrrverandi lögreglumaður og dæmdur kynferðisafbrotamaður, er kominn aftur á kreik. Hallur Gunnar hefur stöðu sakbornings í máli sem snýr að skotárás á bíl fjölskyldu Dags B. Eggertssonar, borgarstjóra, sem átti sér stað í byrjun árs. Alvarlegar hótanir hans í garð Baldurs Borgþórssonar, varaborgarfulltrúa Miðflokksins, í vikunni urðu til þess sérsveit ríkislögreglustjóra vaktaði Ráðhúsið á meðan borgarstjórnarfundur stóð yfir í gær. Fréttablaðið greindi fyrst frá.
Í viðtali við Vísir staðfestir Baldur að hann hafi hringt í neyðarnúmer ríkislögreglustjóra eftir að honum bárust alvarlegar hótanir á þriðjudaginn.
„Þetta er er aðili, sem hefur verið að hringja í mig nokkrum sinnum og brá nú á það ráð að fara dýpra ofan í málin. Þetta leiddi til þess að ég hringdi í ríkislögreglustjóra eins og við eigum að gera ef við lendum í áreiti, við sem erum fulltrúar þarna niðri í Ráðhúsi. Það var það sem ég þurfti að grípa til á þriðjudaginn,“ segir Baldur.
Þá staðfestir hann að um sama mann sé að ræða og er grunaður um að hafa skotið á bíl borgarstjóra og höfuðstöðvar nokkurra stjórnmálaflokka fyrr á árinu.
Sá maður er Hallur Gunnar Erlingsson. Skömmu eftir skotárásina á fjölskyldubíl borgarstjóra var Hallur Gunnar handtekinn og látinn sæta gæsluvarðhaldi í tæpa viku. Honum var síðan sleppt lausum en að því er DV kemst næst hefur ákæra ekki enn verið gefin út í málinu.
Hallur Gunnar hlaut dóm árið 2003 fyrir kynferðisbrot gegn ungum stúlkum. Hann lauk afplánun árið 2005 og hlaut uppreisn æru árið 2010.