Gríðarlegar tafir eru nú á umferðarflæði á austurleið yfir Hellisheiði vegna þriggja bíla áreksturs sem varð við Hveragerði á Þjóðvegi 1. Samkvæmt viðmælanda DV nær bílaröðin frá Hveragerði upp Kambana og upp á Hellisheiði.
Engar upplýsingar hafa fengist enn frá lögreglunni á Suðurlandi um hvort áreksturinn hafi verið alvarlegur eða hvort einhverjir hafa slasast. Samkvæmt upplýsingum DV hefur veginum ekki verið lokað, en gríðarmiklar tafir eru engu að síður á umferð, sem fyrr segir.
Gríðarlega margir eru nú á ferðalagi um landið og mikil umferð mælst á vegum landsins síðustu daga. Þúsundir sleiktu sólina fyrir austan og norðan undanfarnar vikur, en af samfélagsmiðlum mátti ráða að þjóðin væri þar öll samankomin í leit að sól og sumaryl.
Búast má við þungri umferð næstu daga, sér í lagi á köflum Suðurlandsvegs og Vesturlandsvegs næst Reykjavík. Mikil þoka lá yfir Hellisheiði í gær sem var í fréttum gærdagsins sögð hafa orsakað slys á heiðinni.