Loftgæðin við gatnamót Miklubrautar og Grensásvegar mældust í dag rauð, samkvæmt samantekt á vefnum loftgaedi.is sem rekinn er af Umhverfisstofnun. Samkvæmt kvarða Umhverfisstofnunar er ástandið talið rautt, eða mjög slæmt, þegar styrkur svifryks mælist yfir 100 míkrógrömm í hverjum rúmmeter lofts.
Veturinn nú er einn snjóléttasti vetur í manna minnum, en minni snjór hefur ekki mælst í Reykjavík síðan 1977. Það hefur leitt til þess að styrkur svifryks í borginni hefur margoft mælst langt yfir heilsuverndarmörkum. Sólarhringsheilsuverndarmörk fyrir svifryk eru 50 míkrógrömm á rúmmetra.
Þegar þetta er skrifað mælist styrkur svifryks á Miklubraut við gatnamót Grensásvegar 80 míkrógrömm á rúmmetra. Raunar hefur styrkur svifryks á þeirri stöð farið yfir 100 míkrógrömm á rúmmetra oftar en 30 sinnum í vetur. Í nóvember var börnum á leikskólanum Álftaborg við Safamýri haldið inni vegna svifryksmengunar.
Á vefsíðu Umhverfisstofnunar segir að kaldir dagar þegar það er stilla og þurrt í lofti geti leitt til aukins styrks svifryks í lofti. Þá er mikil umferð og þá helst við stórar umferðaræðar sagt auka svifryk til muna.
Á árum áður var það stundað af Reykjavíkurborg að rykbinda götur með því að úða magnesíum klóríði yfir stofngötur í Reykjavík, en það hefur ekki verið gert um nokkurt skeið.
Þegar svifryks verður vart í andrúmslofti hefur Umhverfisstofnun mælt með því að þeir sem viðkvæmir eru fyrir skertum loftgæðum loki gluggum og hurðum og kyndi vel inni hjá sér. Það býr til yfirþrýsting á lofti inni í vistarverum sem kemur í veg fyrir að óhreint loft komist inn.
Tímalína yfir styrk svifryks í lofti Reykvíkinga í vetur má sjá hér að neðan.