Þeir Rafn Valur Alfreðsson og Hjalti Jón Pálsson ákváðu að gera sér ferð að gosinu í Geldingadal í dag. Félagarnir fóru á fjallahjólum og hjóluðu slóða að eldgosinu en svo kom björgunarsveitabíll á móti þeim á fullri ferð. Ný sprunga hafði opnast rétt hjá slóðanum sem Rafn og Hjalti voru nýbúnir að hjóla. Það er mbl.is sem greinir frá þessu.
„Það kom björgunarsveitarbíll á móti okkur á fullri ferð. Við vorum bara rétt búnir að stoppa áður en við ætluðum upp síðustu brekkuna, sem er dálítið brött. Þá kemur hann bara niður á milljón og allir gasmælar í botni og okkur sagt okkur að verið væri að rýma svæðið,“ segir Rafn í samtali við mbl.is.
Eftir það hjóluðu þeir Rafn og Hjalti um hálfan kílómetra upp á hæð, þá sáu þeir gufustrókana og hraunið flæða upp rétt við slóðann sem þeir voru nýbúnir að hjóla yfir. Í samtalinu við mbl.is segir Rafn að hvorki hann né Hjalti urðu varir við neitt fyrr en eftir að björgunarsveitin kom. Þrátt fyrir að hafa verið svona tæpir á að lenda í nýju sprungunni segjast þeir ekki hafa verið hræddir, upplifunin var mjög skemmtileg.