Matthías Már Magnússon, tónlistarstjóri RÚV og Rás 2, er mjög hrifinn af framlagi Úkraínu í Eurovision í ár ef marka má Facebook-færslu hans. Hann birti tónlistarmyndbandið við lagið í dag og skrifaði við það „Ég verð að sjálfsögðu team Daði alla leið í Eurovision í ár EN!!! Þetta lag er gjörsamlega sturlað.“
Lagið ber nafnið „Shum“ en það dregur innblástur af gömlum úkraínskum þjóðlögum. Hljómsveitin sem syngur lagið heitir Go_A og átti upphaflega að taka þátt í keppninni í fyrra en henni var aflýst vegna Covid-19. Úkraínumenn tóku því upp sama fyrirkomulag og Ísland og buðu hljómsveitinni að taka þátt með nýju lagi. Úr því var þetta frábæra lag.
Lagið skorar ekki vel í veðbönkum en Ísland trónir enn toppinn á þeim flest öllum, án þess að lagið sé komið út. Lag Daða Freys kemur út 13. mars í sjónvarpsþættinum Straumar á RÚV. Lokakeppni Eurovision fer síðan fram í Rotterdam 18.-22. maí.
Hér fyrir neðan má heyra þetta lag sem Matthías er svo hrifinn af.