Skömmu fyrir miðnætti var tilkynnt um fjórar manneskjur sem væru að sparka í hurðir í Miðborginni. Þegar lögreglan kom á vettvang óku maður og kona á brott á vespu og reyndu að komast undan lögreglunni. Á flóttanum ók ökumaðurinn, karl, á lokunarslá við Alþingishúsið. Konan var flutt með sjúkrabifreið á bráðadeild en hún fann til verkja í baki. Ökumaðurinn var handtekinn en hann er grunaður um ölvun við akstur. Lokunarsláin skemmdist við ákeyrsluna.
Á tólfa tímanum í gærkvöldi var tilkynnt um þjófnað á rafhlaupahjóli sem hafði staðið við veitingastað í Miðborginni.
Á sjöunda tímanum í gær varð árekstur í Mosfellsbæ. Tvær bifreiðar skemmdust mikið. Báðir ökumennirnir og einn farþegi voru fluttir með sjúkrabifreiðum á bráðadeild.
Tveir ökumenn voru handteknir grunaðir um að vera undir áhrifum fíkniefna og lyfja.