Ernst & Young í Bandaríkjunum hefur tilnefnt Guðmund Fertram Sigurjónsson, forstjóra Kerecis, frumkvöðul ársins 2021. Verðlaunin eru á meðal þeirra stærstu sem í boði eru fyrir frumkvöðlastörf og eru þau viðurkenning til framúrskarandi frumkvöðla fyrir leiðtogahæfni, árangur í rekstri, samfélagsábyrgð og uppbyggingu fyrirtækja. Guðmundur Fertram var valinn af óháðri nefnd sem tilkynnti niðurstöðuna í vikunni sem er að líða.

„Verðlaunin eru viðurkenning á tækninni okkar og hversu vel hún nýtist alvarlega slösuðum og þeim sem þjást af þrálátum sárum,“ segir Guðmundur. „Ég er afskaplega þakklátur þeim sem slógust í hópinn við stofnun fyrirtækisins, vísindaráðinu okkar, fjárfestum, Fanneyju eiginkonu minni og öllum í Kerecis – heiðurinn er auðvitað þeirra allra! Þetta er frábær dagur fyrir Kerecis og þær þúsundir sjúklinga sem verið er að meðhöndla um allan heim með sáraroðinu í dag.“

Undanfarin 35 ár hefur Ernst & Young heiðrað frumkvöðla sem hafa sýnt fram á metnað, kjark og hugvitssemi sem skilar sér í góðum árangri fyrirtækja og hafa víðtæk og jákvæð áhrif á iðnað og umhverfi.

Með tilnefningunni verður Guðmundur Fertram meðlimur hóps virtra frumkvöðla sem hafa unnið til verðlauna Ernst & Young.

Kerecis er brautryðjandi í framleiðslu á lækningavörum úr þorskroði og fitusýrum sem verja líkamsvefi og græða. Vörur fyrirtækisins eru framleiddar á Ísafirði, vöruþróun fer fram í Reykjavík og sölu- og markaðsstarf á Washington D.C. svæðinu í Bandaríkjunum og í Sviss