Gylfi Þór Þorsteinsson hefur staðið vaktina í farsóttarhúsinu seinasta árið. Gyfli starfaði áður í fjölmiðlum og var meðal annars framkvæmdastjóri mbl.is frá 2010-2012.
Gylfi Þór var viðmælandi Mörtu Maríu vegna tíu ára afmælis Smartlands í 64 blaðsíðna Smartlandsblaði. Þar ræðir hann erfiða stundir sem hann upplifði á sínum tíma.
Móðir Gylfa var myrt af bróður sínum árið 1996 þegar Gylfi var 26 ára gamall. Hún hafði farið að heimsækja bróður sinn til að gera upp mál eftir andlát móður þeirra.
„Mamma var astmaveik og við feðgarnir vorum eiginlega vissir um að astminn hefði dregið hana til dauða. Daginn eftir að við fréttum af andlátinu förum við til Akureyrar, en hún hafði verið að heimsækja bróður sinn sem framdi verknaðinn,“ segir Gylfi en á þessum tímapunkti vissi hann ekki að hún hafi verið myrt, hvað þá af bróður sínum.
Þegar komið var á lögreglustöðina á Akureyri fór hann í stutta yfirheyrslu en faðir Gylfa var yfirheyrður í marga tíma. Gylfi beið frammi og vissi ekkert hvað væri að gerast. Á lögreglustöðinni mætti hann móðurbróður sínum sem vottaði Gylfa samúð sína. Gylfi vissi enn ekki að hann hafi verið banamaður móður sinnar og sagði: „Sömuleiðis“.
„Þegar pabbi losnaði úr yfirheyrslunni hjá lögreglunni fórum við upp á hótel og kveiktum á sjónvarpinu. Þar var fyrsta frétt að morð hefði verið framið á þessum bæ og mynd af bænum. Þannig fréttum við að hún hefði verið myrt,“ segir Gylfi og bætir við að það hafi verið mikið áfall að fá þessar fréttir, þá sérstaklega með þessum hætti.
Lögreglan bað Gylfa og fjölskyldu afsökunar á því að hafa heyrt af þessu með þessum hætti.
„Okkar fyrstu viðbrögð voru að við vildum fá að sjá hana strax. Ég hef séð lík, bæði fyrir þennan tíma og eftir, en þetta var sjón sem ég mun aldrei gleyma. Ekki bara var þetta mamma mín sem lá þarna, en þarna sást að andlátið hafði ekki borið að með eðlilegum hætti,“ segir Gylfi að bróðir móður hans sat inni í sex ár fyrir verknaðinn.
Hér má lesa allt viðtalið, ásamt blaðinu í heild sinni.
