Óhætt er að segja að landslagið í Geldingadölum hafi tekið gríðarlegum breytingum frá því gosið hófst kvöldið 19. mars.
Gígopin eru nú orðin átta talsins en síðustu opin mynduðust öll í línu á milli gígana tveggja sem fyrst opnuðust og gíga númer þrjú og fjögur. Gígarnir mynda nú gríðarlegt sjónarspil, sér í lagi að nóttu til í myrkrinu, en blaðamaður fangaði meðfylgjandi myndband seint í gærkvöldi. Þrátt fyrir sæmilega sunnanátt mældist gasstyrkur yfir heilsumörkum víða á svæðinu. Á gangi um svæðið mátti víða heyra viðvörunarhljóð úr gasmælum viðbragðsaðila.
Myndbandið má sjá neðst í fréttinni.
Hraunið úr þeim öllum hefur nú myndað eina stóra hraunbreiðu. Austan megin við hraunið er enn hægt að nálgast nýju gígana en búast má við því að hraunið breiði betur úr sér næstu daga og loki þá „vík“ inn í hraunbreiðuna.
Blaðamaður DV var á svæðinu í gær og náði meðfylgjandi myndbandi. Á kortinu hér að neðan, sem fengið er að láni af vefnum map.is, má sjá hvar blaðamaður stóð (blár punktur) og rauða strikið er svokölluð gönguleið A. Búist er við að hraunið renni yfir þá leið fljótlega þegar Geldingadalur fyllist og hraun tekur að flæða niður rennuna í átt að Nátthaga. Gönguleið B liggur austan megin við gosið og hraunbreiðuna.
Hraun hefur þegar flætt yfir veginn sem fjölmiðlamenn og viðbragðsaðilar notuðu í Meradölum en hægt hefur verulega á flæðinu þangað niður frá því sem fyrst var og hraunið sem þveraði slóðann í Meradölum kólnað.