Í dag fengu foreldrar og forráðamenn nemenda í 5. bekk í Háteigsskóla tölvupóst frá kennurum varðandi klám áhorf í bekknum. „Okkur hafa borist nokkrar ábendingar um að nemendur í 5. bekk séu að skoða klám í símunum sínum,“ segir í tölvupóstinum til foreldranna. „Við viljum vekja athygli ykkar á þessu og biðja ykkur um skoða málið með ykkar barni.“
„Þetta er úti um allt, þetta er ekki bara hér,“ segir Arndís Steinþórsdóttir, skólastjóri Háteigsskóla, í samtali við DV um málið. Arndís var föst á ráðstefnu á netinu og náði því ekki að ræða málið frekar.
Fyrr í vikunni greindi DV frá öðru máli sem varðaði áhorf á klámi hjá grunnskólabörnum en það mál var í Rimaskóla í Grafarvogi. Umræða skapaðist í Facebook-hóp íbúa í Grafarvogi eftir að áhyggjufull móðir sagði að 9 ára sonur sinn hafi verið að horfa á klám í kjölfar þess að aðrir krakkar sögðu honum að gera það.
„Orðið gengur um að krakkar benda á PornHub síðuna um að skoða hana! Minn 9 ára var að skoða hana út af einhver í skólanum sagði honum að gera það!“ skrifaði móðirin á Facebook. Þóranna Rósa Ólafsdóttir, skólastjóri Rimaskóla, ræddi við DV um málið í vikunni og sagði að um væri að ræða mikið vandamál í skólanum.
Þóranna sendi foreldrum tölvupóst til að vekja athygli á vandamálinu. „Ég sendi það á foreldra að nemendur eru að gera óæskilega hluti í símanum sínum,“ sagði hún í samtali við DV. „Það þarf að kenna þeim að nota þessi tæki. Það þarf að huga að því sem er að gerast í símanum hjá börnunum.“
Hrefna Sigurjónsdóttir, framkvæmdastjóri Heimilis og skóla, segir að þetta sé mikið áhyggjuefni. Hún hvetur börn og foreldra til að tilkynna um svona mál, bæði til skólans en síðan er einnig hægt að hafa samband við Heimili og skóla. Þá segir hún mikilvægt að foreldrar tali við börnin sín um hvað sé æskilegt að gera á netinu.
Einnig er mikilvægt að skólar og foreldrar vinni saman þegar svona mál koma upp. Skólayfirvöld ættu að vera dugleg þegar kemur að upplýsingaflæði um leiðindamál til foreldra. Það getur hjálpað með það að stöðva svona mál í fæðingu. „Það þarf að vera með eitthvað plan eða viðbragðsáætlun, því það munu koma upp svona mál. Þetta getur gerst, hvernig ætlar fólk að takast á við það þegar þetta gerist.“
„Það þarf að reyna að vera meðvituð um það sem börnin eru að gera á netinu. Þó svo það sé ekki alltaf hægt að fylgjast með öllu er mikilvægt að það sé ekki bara frír passi á allt,“ segir Hrefna. Mikilvægt er að búa til traust svo börn geti leitað til foreldra eða annarra fullorðinna ef þau sjá eitthvað sem lætur þeim líða illa. Ef börn geta ekki, eða þora ekki, að segja foreldrum frá svona málum þá geta þau líka leitað í hjálparsíma Rauða Krossins, í símanúmerið 1717. Þá vekur Hrefna athygli á ábendingalínu Barnaheilla sem er hluti af SAFT (Samfélag, fjölskylda og tækni) samstarfsverkefninu.