Héraðsdómur Reykjavíkur hafnaði í dag kröfu fjögurra manna írakskrar fjölskyldu um að úrskurður úrskurðarnefndar útlendingamála yrði ógiltur.
Úrskurður nefndarinnar var á þá leið að stefnendur séu ekki flóttamenn og þeim skuli synjað um réttarstöðu flóttamanna og viðbótarvernd á Íslandi, og að synja ætti þeim um dvalarleyfi á grundvelli mannúðarsjónarmiða.
Fjölskyldan sagðist óttast „valdamikinn hershöfðingja“ í Írak vegna þess að Bikthiyar hafi týnt minniskorti sem innihélt myndir úr veislu herforingjans. Segir í niðurstöðu úrskurðarnefndar að „nokkur ólíkindablær“ sé yfir frásögn fólksins. Þar sagði jafnframt:
Kærunefnd telur, m.a. í ljósi þeirra íhaldssömu viðhorfa sem tíðkast í KRI, að ólíklegt sé að einstaklingur sem sé háttsettur í hernum fá utanaðkomandi aðila til að taka myndir í samkvæmi þar sem áfengi sé haft um hönd og konur klæðist efnislitlum fötum. Svör kæranda um þessa atburði, einkum þeir hlutar frásagnar hans sem varða hvernig hann glataði umræddu minniskorti, óljós svör um geymslu þess, auglýsingar eftir því í blöðum. […] Með vísan til alls framangreinds telur kærunefnd frásögn kærenda hvað varðar ástæðu flótta þeirra frá heimaríki vera ótrúverðuga.
Til grundvallar kröfu sinnar fyrir héraðsdómi um ógildingu ákvörðun úrskurðarnefndar lagði fjölskyldan m.a. til grundvallar að þau óttuðust um líf sitt og frelsi í heimalandi sínu. Þar af leiðandi væri það brot á íslenskri stjórnarskrá að senda þau til síns heima. Fólkinu var vísað úr landi í kjölfar niðurstöðu úrskurðarnefndar í fyrra og dvelja þau nú á Ítalíu, samkvæmt því er fram kemur í dómnum.
Þá hélt lögmaður fjölskyldunnar því einnig fram að stjórnsýslureglur hefðu verið brotnar við meðferð Útlendingastofnunar og kærunefndar í útlendingamálum, og að það ætti að leiða til ógildingar úrskurðarins. Á þetta féllst Héraðsdómur Reykjavíkur ekki.
Lögmaður Khattab fjölskyldunnar í málinu var Helgi Þorsteinsson, en Helgi starfar fyrir lögmannsstofuna Norðdahl & Valdimarsson. Norðdahl nafnið í nafni stofunnar vísar til Magnúsar Davíðs Norðdahl, sem var og er lögmaður egypsku Khedr fjölskyldunnar sem nú er í felum á Íslandi.
Magnús hefur höfðað mál á hendur ríkinu og krafist þess að úrskurður Úrskurðarnefndar í útlendingamálum verði ógiltur, rétt eins og Helgi gerði í máli írösku fjölskyldunnar. Magnús hefur jafnframt óskað eftir flýtimeðferð, enda fjölskyldan enn í landinu. Ósk Magnúsar um flýtimeðferð er nú á borði dómstjóra Héraðsdóms Reykjavíkur, Símonar Sigvaldasonar.