Sóttvarnaryfirvöld hafa ákveðið að stærri hópur starfsfólks Torgs verði settur í sóttkví en áður hafði verið tilkynnt, en Torg er útgáfufélag Fréttablaðsins og DV. Ekki liggur fyrir á þessari stundu hversu margir þurfa að fara í sóttkví. Fréttablaðið greindi fyrst frá þessum nýju vendingum. 

Á fimmtudag var sagt frá því að COVID-19 smit hefði komið upp á ritstjórn DV og var öll ritstjórn blaðsins send í sóttkví, utan starfsmanns sem var í vaktafríi þann dag sem smitaður starfsmaður var við vinnu, og starfsfólks í sumarleyfi. Ekki er vitað um ný smit meðal starfsfólks fyrirtækisins.

Hvorki er gert ráð fyrir að frétta­þjónusta á fretta­bladid.is né út­gáfa Frétta­blaðsins raskist við þetta, en fréttaþjónusta á dv.is hefur haldist óbreytt síðan starfsfólk fór í sóttkví og helgarblað DV kom út á föstudag. Starfsfólk fyrirtækisins býr að góðri reynslu af fjarvinnu síðan samkomubann miðaðist við 20 manns í vor.