Alvarlegt atvik sem tengist Neyðarlínunni og varð fyrr í mánuðinum hefur orðið til þess að fulltrúar Neyðarlínunnar hafa verið kallaðir á fund hjá Mannréttinda-, nýsköpunar- og lýðræðisráðs Reykjavíkurborgar kl. 13 í dag þar sem þeir þurfa að svara gagnrýnum spurningum.
Vefur Fréttablaðsins greindi frá málinu þann 17. maí síðastliðnn. Skellt var á ungmenni sem hringdu í Neyðarlínuna til að tilkynna alvarlegt atvik í miðbænum, en tvær stúlkur lágu meðvitundarlausar á Laugaveginum. Í frétt Fréttablaðsins segir:
„Hóp vinkvenna brá mikið í gærkvöldi þegar þær gengu fram á tvær meðvitundarlausar ungar stúlkur á Laugaveginum. Tveir vinir stúlknanna stóðu yfir þeim að reyna að veita þeim aðstoð og höfðu þegar hringt á sjúkrabíl. Þrátt fyrir ítrekuð símtöl í neyðarlínuna, bæði frá vinkonuhópnum og drengjunum, barst þó að þeirra sögn engin hjálp fyrr en einn lögreglubíll mætti á staðinn um 25 mínútum seinna. Sjúkrabíllinn kom svo ekki fyrr en lögregla hafði sjálf kallað eftir honum.
„Þetta var alveg ömurleg reynsla,“ segir Kristín Reynisdóttir, kaupmaður og fyrrum kennari, ein fjögurra vinkvenna sem gengu fram á stúlkurnar í gærkvöldi. „Við héldum í alvöru öll þarna að þær væru bara að deyja.“
Hún lýsir því í samtali við Fréttablaðið hvernig stúlkurnar hafi hnigið niður í götuna á svipuðum tíma, að sögn vina þeirra, og að þær vinkonurnar hafi gengið fram á þær rétt eftir að þær hnigu niður. „Ástand þeirra varð svo sífellt verra og augun voru ýmist starandi upp í loftið eða alveg lokuð. Þær sýndu engin viðbrögð við nafnakalli og voru báðar froðufellandi,“ segir hún. Þær hafi svo byrjað að kasta upp á sama tíma og önnur þeirra hafi kastað upp blóði.“
Hjá Neyðarlínunni fengu ungmennin þau viðbrögð að lögregla væri á leiðinni en þegar þau svöruðu því til að það væri þörf á læknisaðstoð en ekki lögreglu var bara skellt á. Eftir hátt í hálftíma bið kom loks lögregla á vettvang og hringdi þá á sjúkrabíl.
„Ég held að þeim hafi bara mjög brugðið þegar þeir sáu ástandið á stelpunum og þeir hringdu strax á sjúkrabíl. Þá kom hann bara á skikkanlegum tíma eftir smá stund,“ segir viðmælandi Fréttablaðsins.
„Okkur finnst þetta atvik alvarlegt. Við viljum athuga hvort þetta voru mistök eða kerfisbundin brotalöm,“ segir Dóra Björt Guðjónsdóttir, formaður Mannréttinda-, nýsköpunar- og lýðræðisráðs, og borgarfulltrúi Pírata, í viðtali við DV.
Dóra segir mikilvægt að hægt sé að treysta Neyðarlínunni og skýringar á þessu atviki verði að koma fram: „Það ýtir ekki undir tiltrú eða traust ef hlutir eru slegnir út af borðinu að óskoðuðu máli. Við viljum geta treyst Neyðarlínunni.“
Dóra setur málið í víðara pólitískt samhengi og segir:
„Ég tel það vera mitt hlutverk sem stjórnmálamanneskja að vera málsvari þeirra sem hafa upplifað óréttlæti. Það er þreyta meðal almennings vegna aðgerðarleysis og tómlætis gagnvart óréttlæti. Dæmi um slíkt eru Samherjamálið sem var stungið undir stól og svo þetta rugl í kringum arðgreiðslur í tengslum við hlutabótaleiðina.“
Dóra segir að fordómar megi ekki lita starf Neyðarlínunnar og ganga verði úr skugga um að svo sé ekki:
„Almenningur á skilið að það sé hlustað og brugðist við. Það væri alvarlegt ef viðhorf Neyðarlínunnar einkennist af fordómum sem leiðir til mismununar í garð jaðarsettra hópa, fólks af erlendum uppruna og fólks sem neytir vímuefna, á verstu mögulega stundu sem snýst um líf og dauða. Jafnvel ásýnd slíks viðhorfs, þó bara væri um ásýnd að ræða, getur verið gríðarlega skaðleg og því þarf að svara fyrir þetta.“