Innbrotsþjófur skrifaði skilaboð til starfsfólks Heilbrigðisstofnunar Suðurnesja (HSS) eftir að hafa brotist inn í bygginguna og stolið þaðan lyfjum. Í nýföllnum dómi Héraðsdóms Reykjaness vegna málsins segir:
„Segir í frumskýrslu A, sem hann staðfesti fyrir dómi, að rætt hafi verið við Cvakthafandi hjúkrunarfræðing. Hún kvaðst hafa farið inn á bráðamóttöku kl. 07:30 eftir að boð bárust um breytt hitastig í lyfjakæli. Þar hafi hún séð á tölvuskjá eftirfarandi skilaboð: „mættuð passa meira. Hafa glugga lokaða og öryggibetri t.d. myndavelar. Þakka lyfin sorry .þarf að borga mitt.“ Að sögn C hafi greinilega verið búið að róta í skúffum á bráðamóttökunni. Við nánari athugun kom í ljós að baðherbergisgluggi við röntgenstofu var opinn.“
Maður var ákærður vegna innbrotsins og var málið þingfest 13. febrúar á þessu ári og dómtekið þann 20. maí. Dómur féll í málinu í morgun og var umræddur maður sýknaður af ákæru um þetta innbrot vegna þess að ýmislegt hafi misfarist í rannsókn lögreglu á málinu. Meðákærður var hins vegar dæmdur fyrir hylmingu með því að hafa í vörslu sinni lyf frá HSS sem hurfu í innbrotinu. Meðákærði var líka dæmdur fyrir önnur brot, umferðarlaga- og fíkniefnalagabrot, og var dæmdur til 500.000 króna sektargreiðslu og sviptur ökurétti í 14 mánuði.
Dómurinn sakar lögreglu um ýmsa ónákvæmni í rannsókninni og segir meðal annars:
„Af frumskýrslu A lögreglumanns verður ekki ráðið með vissu hvort vakthafandi hjúkrunarfræðingur hafi saknað lyfja úr lyfjavagni eða öðrum lyfjageymslum HSS þegar lögregla kom á vettvang laust eftir kl. 07:48 að morgni laugardagsins og verður ekki ráðið af gögnum máls að HSS hafi gengið úr skugga um það með sjálfstæðri skoðun á birgðahaldi hvort og þá hvaða lyf voru tekin og í hvaða magni. F læknir, sem móttók ótilgreint magn lyfja frá lögreglu sama dag, bjó ekki yfir sjálfstæðri vitneskju um þessi atriði. Virðist afhendinglyfja þvíeingöngu byggð á lista sem lögregla tók saman á grundvelli þess sem fannst í fórum ákærða…“