Maður sem fluttur var með sjúkraflugi eftir húsbruna í Hafnarstræti 37 á Akureyri á þriðjudagskvöld er látinn. Hann lést seinnipartinn í gær á gjörgæsludeild Landspítalans. Maðurinn var 67 ára gamall.

Þetta kemur fram í tilkynningu frá Lögreglunni á Norðurlandi eystra og þar segir enn fremur:

„Vettvangsrannsókn á upptökum brunans fór fram í gær af tæknideild lögreglu. Meðal þess sem tekið verður til frekari skoðunar er rafmagnstæki. Að öðru leyti er rannsóknin á frumstigi og ekki unnt að veita frekari upplýsingar.

Ættingjum hins látna vottum við okkar dýpstu samúð.“