Um þúsund manns, þar af sjö Íslendingar, sem dvelja á H10 Costa Adeje Palace-hótelinu á Tenerife eru nú í sóttkví eftir að ítalskur læknir greindist með kórónaveiruna. Maðurinn var í fríi á Tenerife þegar hann greindist. Íslenskar ferðaskrifstofur hafa boðið upp á dvöl á umræddu hóteli.

Í frétt Metro kemur fram að laganna verðir hafi verið við hótelið til að tryggja að enginn komist af því og enginn geti farið á það. Þetta er gert til að hefta útbreiðslu veirunnar eftir fremsta megni.

Læknirinn er nú í einangrun en von er á lokaniðurstöðum úr sýnatökum seinna í dag, en bráðabirgðaniðurstöður gáfu til kynna að maðurinn væri með Covid-19 kórónaveiruna.

Í frétt Metro kemur fram að læknirinn sé frá Lombardy-héraði á Ítalíu en þar hefur fjöldi fólks greinst með veiruna undanfarna daga. Talið er að maðurinn hafi dvalið á umræddu hóteli síðustu sex daga ásamt eiginkonu sinni. Maðurinn er sagður hafa verið með hita í nokkra daga uns hann fór til læknis þar sem grunur um kórónaveiruna vaknaði.

Í frétt Vísis í morgun kemur fram að Heimsferðir og Úrval Útsýn séu meðal þeirra ferðaskrifstofa sem boðið hafa upp á dvöl á hótelinu. Upplýsingar á íslensku um hótelið má einnig finna á vef Plús ferða. Ekki liggur fyrir hvort einhverjir Íslendingar séu á umræddu hóteli en þó hefur verið staðfest þrír Danir hið minnsta og tveir Svíar séu á hótelinu.

Frétt uppfærð klukkan 09:03 

Þráinn Vigfússon, framkvæmdastjóri Vita, segir við Vísi að sjö Íslendingar séu í sóttkví á hótelinu. Íslendingarnir, sem dvelja í tveimur herbergjum, keyptu sér ferð í gegnum Vita.