Borgarstjórinn í Reykjavík hefur auglýst stöðu borgarritara lausa til umsóknar, en sem kunnugt er var Stefán Eiríksson, sem gegnt hefur stöðunni, ráðinn útvarpsstjóri á dögunum. Í tilkynningu frá Reykjavíkurborg segir að leitað sé að „kraftmiklum leiðtoga sem býr yfir frumkvæði og faglegum metnaði, er annt um umhverfi sitt, samfélag og velferð íbúa,“ eins og það er orðað.
Borgarritari er æðsti embættismaður Reykjavíkurborgar að borgarstjóra undanskildum. Hann fer með forystu- og samhæfingarhlutverk í stjórnsýslu og þjónustu borgarinnar. Borgarritari er einn af staðgenglum borgarstjóra og tilheyrir yfirstjórn Reykjavíkurborgar.
Í tilkynningu frá borginni kemur fram að hlutverk borgarritara sé að hafa forystu um að Reykjavíkurborg sé í fararbroddi í þróun þjónustu, stjórnsýslu og rekstri á landsvísu og standist samanburð við framsæknar borgir í alþjóðlegum samanburði.
„Borgarritari sér til að stefnumörkun borgarráðs og borgarstjórnar sé fylgt eftir með upplýsingamiðlun og stoðþjónustu við fagsvið borgarinnar, auk þess að halda uppi eftirlit með að framkvæmd sé í samræmi við markaða stefnu og fjárhagsheimildir og hefur yfirumsjón með miðlægri stjórnsýslu og stoðþjónustu á vegum Reykjavíkurborgar. Þá er borgarritara ætlað að stuðla að lýðræðislegum stjórnunarháttum með því að auka gegnsæi og styrkja upplýsingaflæði milli stjórnenda, sviða og stofnana borgarinnar, íbúa og annarra samráðsaðila.“
Þá segir að borgarritari fari fyrir samningateymi Reykjavíkurborgar í samskiptum við ríkið, er tengiliður Reykjavíkurborgar við byggðasamlög og B-hluta félög og við atvinnulífið í Reykjavíkurborg og á landsvísu. Þá leiðir borgarritari einnig stór og flókin verkefni sem kalla á samhæfingu og samræmingu innan stjórnkerfis Reykjavíkurborgar og utan þess.
Hér að neðan má sjá menntunar- og hæfniskröfurnar fyrir starfið, en í tilkynningunni kemur fram að Intellecta haldi utan um ráðningarferlið. Hægt er að sækja um stöðuna á vef Intellecta. Þá segir að skipuð hafi verið ráðgefandi hæfnisnefnd sem hefur það hlutverk að fara yfir umsóknir og leggja mat á hæfni umsækjenda. Hæfnisnefndina skipa Regína Ásvaldsdóttir, sviðsstjóri velferðarsviðs Reykjavíkurborgar, sem jafnframt er formaður, Ásta Bjarnadóttir, mannauðsstjóri Landspítalans, og Gylfi Magnússon, dósent við Háskóla Íslands.
Menntunar- og hæfniskröfur:
Framhaldsmenntun á háskólastigi sem nýtist í starfi.
Leiðtogahæfileikar, farsæl reynsla af stjórnun ásamt reynslu af því að leiða breytingar.
Þekking og reynsla af opinberri stjórnsýslu, stefnumótun og áætlanagerð.
Þekking og reynsla af rekstri og mannaforráðum.
Þekking og reynsla af samningagerð og undirbúningi samninga.
Lipurð og hæfni í mannlegum samskiptum.
Framsýni, metnaður, frumkvæði og skipulagshæfileikar.
Hæfni til að tjá sig í ræðu og riti á íslensku og ensku. Kunnátta í öðrum tungumálum er kostur.