Maður lést í vinnuvélaslysi á Suðurlandi í nótt. Þetta kemur fram í tilkynningu lögreglunnar á Suðurlandi.
Mun maðurinn hafa verið að störfum á jarðýtu er hún valt fram af bjargbrún. Beðið var með að tilkynna um slysið opinberlega þar til hægt væri að láta börn hins látna vita af andláti hans. Samkvæmt heimildum DV átti maðurinn níu börn, sum þeirra uppkomin.
Tilkynning lögreglu var eftirfarandi:
„Kl. 07:02 í morgun barst Neyðarlínu tilkynning um slys í malarnámu suðaustanvert í Lambafelli við Þrengslaveg. Þar reyndist jarðýta sem verið var að nota við að losa efni og ýta fram af fjallsbrúninni hafa farið fram af brúninni og ofan í námuna. Stjórnandi vélarinnar, íslenskur karlmaður á sextugs aldri, fannst skammt frá vélinni og reyndist látinn þegar að var komið.
Tildrög slyssins, sem talið er hafa átt sér stað einhverntíman á tímabilinu eftir kl. 23:00 í gærkvöldi og til morguns, eru til rannsóknar hjá lögreglunni á Suðurlandi. Gott væri að fá upplýsingar, frá vegfarendum um Þrengslaveg á þeim tíma geti þeir upplýst með einhverjum hætti um tímasetningar s.s. hvort þeir hafi séð til vinnu vélarinnar. Slíkum upplýsingum má koma til okkar í síma 444 2000, í tölvupósti á sudurland@logreglan.is eða á facebook síðu lögreglunnar á Suðurlandi
Ekki er unnt að veita frekari upplýsingar um rannsóknina að sinni.“
