Meirihluti áhafnar Júlíusar Geirmundssonar Ís-270, í eigu og útgerð Hraðfrystihússins – Gunnvarar hf. á Ísafirði hefur greinst með Covid-19. Þetta kemur fram í tilkynningu félagsins.
Þegar áhafnarmeðlimir sýndu flensueinkenni var ákveðið að sigla skipinu til Ísafjarðarhafnar í gærkvöldi þar sem olíutaka fór fram sem og sýnataka úr áhafnarmeðlimum. Þrjár vikur voru þá liðnar af túrnum. Að því er segir í tilkynningu fóru heilbrigðisstarfsmenn um borð í skipið og tóku þar sýnin. Engir áhafnarmeðlimir fóru í land.
Sýnin voru send til Reykjavíkur í dag og lágu niðurstöður fyrir nú undir kvöld. Kom þá fram jákvæð niðurstaða fyrir meirihluta áhafnarmeðlima. Veiðum var þá hætt og skipinu snúið til næstu hafnar, sem er Ísafjarðarhöfn. Er það væntanlegt þangað á morgun. Í tilkynningu segir að enginn um borð sé alvarlega veikur og munu næstu skref vera stigin í samráði við umdæmislækni sóttvarna á Vestfjörðum.
Í samtali við blaðamann DV sagði Einar Valur Kristjánsson, framkvæmdastjóri HG, að ekki væri unnt að veita frekari upplýsingar en kemur fram í tilkynningu að svo stöddu, en sagði að mönnunum heilsaðist vel og tekið yrði á móti þeim á Ísafirði í fullu samráði við lækna á staðnum.
Skipið er nú statt um 20 kílómetra utan mynnis Ísafjarðardjúps á 10 hnúta siglingu, sem eru um 18 km/klst, eins og sjá má á skjáskoti af Marine Traffic, hér að neðan.