Þrátt fyrir að næturlíf liggi niðri vegna samkomutakmarkana var nokkur erill hjá lögreglu í gær og nótt. 90 mál voru skráð frá kl. 17 í gær til 5 í morgun og tveir gista fangageymslur. Þetta kemur fram í Dagbók Lögreglunnar á höfuðborgarsvæðinu.
Maður í mjög annarlegu ástandi sökum áfengis- og fíkniefnaneyslu var að ógna fólki í verslunarmiðstöðinni í Mjódd í gær, var maðurinn yfirbugaður og vistaður i fangaklefa þar sem hann bíður skýrslutöku. Einnig var maðurinn með fíkniefni meðferðis.
Maður í annarlegu ástandi var til vandræða á veitingastað í hverfi 270. Honum vísað út af staðnum, fjölskyldumeðlimir hans komu honum til aðstoðar og fóru með hann heim til sín svo ekki yrðu frekari vandræði.
Sautján ára stúlka var stöðvuð á 148 kílómetra hraða á Miklubraut þar sem hámarkshraði er 80 kílómetrar á klst. Stúlkan hafði einungis verið með ökuréttindi í tólf daga en má vænta þess að missa ökuréttindi sín ásamt því að fá rúmlega 200.000 kr. sekt. Málið var tilkynnt foreldrum og barnavernd.