Matvælastofnun greiddi fyrir jól 112 milljónir í skaðabætur til fyrirtækisins Kræsinga í Borgarnesi vegna „nautabökumálsins“ svokallaða sem kom upp 2013. Fyrirtækið hét þá Gæðakokkar en málið snerist um magn kjöts í nautabökum frá fyrirtækinu. Fyrirtækið var sýknað af kæru um vörusvik en kæran var lögð fram á grunni rannsóknar Matvælastofnunar.

Morgunblaðið skýrir frá þessu í dag. Fram kemur að skaðabótaskylda Matvælastofnunar hafi síðar fengist viðurkennd fyrir héraðsdómi og hæstarétti. Tekist hefur verið á um upphæð skaðabótanna síðan og sveiflaðist mat á tjóni frá 69 milljónum upp í rúmlega 200 milljónir. Matvælastofnun bauð 69 milljónir í bætur í samræmi við yfirmat.

Morgunblaðið hefur eftir Magnúsi Níelssyni, eiganda Kræsinga, að hann hafi að lokum tekið því tilboði og hafi upphæðin numið 112 milljónum þegar búið var að bæta vöxtum og kostnaði við.

„Þetta var klárað fyrir jól, er jólagjöfin mín það árið. Ég hef gert upp við alla þá birgja sem stóðu með mér í erfiðleikunum og biðu með kröfur sínar.“

Hefur blaðið eftir Magnúsi sem sagði einnig dapurlegt hvernig ríkið þreyti borgarana með málaferlum til að ná sínu fram. Hann sagðist hafa lagt allt undir til að halda fyrirtækinu gangandi, en það hafi tæknilega séð verið gjaldþrota,  og til að standa í málaferlum til að leita réttar síns. Það hefði tekið 3-5 ár að reka nýtt mál og hann hafi ekki séð fram á að geta staðið undir því.

„Það hefði verið hægt að semja árið eftir að ég var sýknaður. Ég myndi gjarnan vilja vita hvað þessi málaferli hafa kostað skattgreiðendur landsins.“

Sagði hann.