Lögreglunni á höfuðborgarsvæðinu barst tilkynning um átök unglingspilta við Salaskóla í gærkvöldi. Í tilkynningunni kom fram að einhverjir í hópnum væru með hnífa og barefli, eins og fjölmiðlar greindu frá í morgun.
Í tilkynningu lögreglu vegna málsins kemur fram að lögregla hafi brugðist skjótt við og haldið þegar á vettvang. Átökin voru yfirstaðin þegar þangað var komið, en lögregla ræddi þó við nokkra hlutaðeigendur og var þeim síðan ekið til síns heima þar sem rætt var við foreldra viðkomandi.
„Engir sjáanlegir áverkar voru á neinum piltanna sem komu við sögu og hvorki hnífar né barefli fundust í tengslum við málið. Unglingarnir voru sammála um að til deilna hefði komið, en sitt sýndist hverjum um atburðarásina. Málið er í rannsókn og unnið í samráði við barnaverndaryfirvöld.“