Þrjátíu og fimm ára karlmaður hefur verið handtekinn vegna gruns um morð á ungri konu í miðbæ Huddersfield á Englandi á fimmtudag. Fórnarlambið, hin 21 árs Bethany Fields, hafði meðal annars stundað rannsóknir á Íslandi.
Breskir fjölmiðlar fjalla um málið, meðal annars BBC og Independent.
Bethany fannst með alvarlega stunguáverka í miðbæ Huddersfield síðdegis á fimmtudag og var 35 ára karlmaður, Paul Crowther, handtekinn skömmu síðar. Breskir fjölmiðlar greina frá því að Bethany og Paul hafi þekkst.
Í frétt Yorkmix kemur fram að Bethany hafi stundað nám í umhverfislandfræði við University of York Mark E. Hodson, kennari við skólann, segir að Bethany hafi verið duglegur nemandi og vinsæl meðal samnemenda.
Þá segir Mark að Bethany hafi haft sérstaklega gaman af ferðum sem tengdust náminu, til dæmis til Lake District á Norðvestur-Englandi og til Íslands þar sem hluti námsins fór fram. Á Íslandi er hún sögð hafa rannsakað áhrif jöklabráðnunar á umhverfið og þá hafði hún stundað rannsóknir á eldfjöllum á Kanaríeyjum.
