Blaðamaður Fréttablaðsins, Helgi Vífill Júlíusson, telur blaðamenn farna fram úr sér í kjarabaráttunni. Laun vegna starfa þeirra séu of lág en óraunhæft sé að vonast eftir hækkunum að svo stöddu. Þetta kemur fram í skoðunarpistli Helga í Markaðnum, fylgiriti Fréttablaðsins, í dag.
Helgi Vífill segir það skiljanlegt að Blaðamannafélagi Íslands finnist stytting vinnuvikunnar ekki mikilvægt samningsatriði fyrir blaðamenn sem nú þegar vinni umfram vinnuskyldu án þess að fá fyrir það greitt. Hins vegar telur Helgi Vífill að þetta mætti útfæra til að henta stéttinni. Til dæmis með því að bjóða upp á sveigjanlegan vinnutíma.
„Að sama skapi hafa blaðamenn farið fram úr sér í kjarabaráttu sinni. Að sjálfsögðu vil ég hærri laun fyrir mig og samstarfsmenn mína. Of margir blaðamenn eru á alltof lágum launum. Flest eigum við skilið vænar launahækkanir. Veruleikinn er því miður sá, að það er ekki raunhæft eins og sakir standa að hækka launin.“
Kjarabaráttan eigi sér stað á tíma þar sem einkareknir fjölmiðlar standi höllum fæti í samfélaginu. Auglýsingatekjur hafi dregist saman og áskrifendum fækkað.
„Fyrirtæki verða að geta staðið undir launahækkunum. Annars fara þau á hausinn eða segja upp starfsmönnum í hagræðingarskyni. Í ljósi erfiðs rekstrarumhverfis óttast ég að störfum muni fækka í greininni. Hvernig blaðamenn standa að kjarabaráttu okkar hefur aukið á þann ótta.“
Helgi Vífill sér þrennt í stöðunni sem geti bætt stöðu einkarekinna fjölmiðla; fleiri áskrifendur, lægri skattar og ekkert RÚV.
Helgi Vífill er ekki fyrstur til að viðra þá skoðun að kröfur Blaðamannafélagsins séu skaðlegar stéttinni. Stefán Einar Stefánsson, viðskiptaritstjóri Morgunblaðsins, hefur kennt kjarabaráttunni um nýlegar uppsagnir sem áttu sér stað hjá Morgunblaðinu, og verið harðlega gagnrýndur fyrir þá fullyrðingu.
Sjá einnig:
*Blaðamaður er í Blaðamannafélagi Íslands