„Það er eitthvað undarlegt í gangi á Íslandi og kominn tími til að hreinsa upp,“ segir Norðmaðurinn Svein Harald Øygard sem var Seðlabankastjóri Íslands í nokkra mánuði skömmu eftir hrun. Svein segir að uppgötvanir um stórfelld undanskot Íslendinga á fé í skattaskjól hefðu átt að vekja fólk upp. Samherjamálið kalli síðan á ítarlega rannsókn og uppgjör.
Svein segir að honum þyki vænt um Ísland en það hvernig fólk tali hér um skattaskjól og ýmsa fjármagnsgerninga sé eitthvað sem hann hafi aldrei heyrt í Noregi. Hrunið, skattaskjólin og vera Íslands á gráum lista FATF hópsins gegn peningaþvætti spilli orðspori Íslands sem duglegrar og heiðarlegrar þjóðar. Þetta geti líka heft aðgang íslenskra fjárfesta að fjármagni. Þess vegna sé svo mikilvægt að Íslendingar hreinsi til og geri þessi mál rækilega upp.
Þetta kom fram í viðtali Øygard í Silfrinu í dag.
Norski bankinn DNB hefur dregist inn í Samherjamálið vegna flutnings bankans á fjármagni fyrir Samherja til Kýpur. Segist Øygard sannfærður um að þau mál verði rannsökuð vandlega í Noregi.