Samtökin Líf án ofbeldis berjast gegn því að börn séu neydd til að umgangast ofbeldisfulla feður sína og segja það oft vera niðurstöðuna í úrskurðum sýslumanna og dómara í forsjármálum. Samtökin hafa sett upp undirskriftalista á netinu þar sem þess er krafist að dómsmálaráðherra axli ábyrgð á öryggi og vernd barna gegn ofbeldi föður.
Í texta sem fylgir undirskriftalistanum úr hlaði segir meðal annars:
„Við krefjumst þess að sjónarmið Barnasáttmála Sameinuðu þjóðanna séu virt í réttarákvörðun sýslumanna, dómara og dómsmálaráðuneytis og að börn eigi rétt til að hafa skoðun á sínum lífsaðstæðum og eigi rétt til verndar frá hverskyns ofbeldi. Við krefjumst þess að lagaframkvæmd sýslumanna og dómara sé í samræmi við þær áherslur sem sammælst hefur verið um í núgildandi barnalögum um aukið vægi ofbeldis við ákvörðun forsjár og umgengni. Í athugasemdum með frumvarpi til barnalaga sem varð að lögum kemur fram að líta verði á ofbeldi í víðum skilningi. Börnin eiga rétt samkvæmt lögum að njóta vafans ef einver vafi er. Við krefjumst þess að í forsjár- og umgengnismálum þar sem barn er í ofbeldishættu í samskiptum við föður hafi réttur barnsins til öryggis og verndar frá ofbeldi afdráttarlausan forgang umfram skyldu móður til að stuðla að samskiptum barnsins við föður sem beitir barnið eða aðra nákomna ofbeldi.“
Brynjar Níelsson, þingmaður Sjálfstæðisflokksins, vakti í dag í umræðum á Alþingi athygli á bréfi sem samtökin hafa sent þingmönnum og inniheldur væntanlega texta í anda þess sem lesa má á undirskriftasíðunni. Vefur Morgunblaðsins greinir frá þessu og hefur eftir Brynjari:
„Miðað við innihald bréfsins er félagsskapurinn samansettur af mæðrum eingöngu sem gera þær kröfur að þingmenn bregðist við því sem þeir sem fara með úrskurðarvald í forsjár- og umgengnismálum, þ.e. sýslumenn og dómstólar, gera. Félagsskapurinn vill að við skiptum okkur af því og breytum einhvern veginn umhverfinu vegna þess að niðurstaðan hentar ekki.“
Brynjar segir tilmæli samtakanna til þingmanna vega að réttaríkinu:
„Ég mun ekki taka þátt í slíku og ég vona að öðrum þingmönnum detti það ekki í hug. Fólk er hér í þeirri baráttu að það gerir kröfu um að við víkjum til hliðar reglum réttarríkisins sem við erum búin að strögla við að koma á árum, áratugum og jafnvel öldum saman. Ég bið þingmenn að íhuga þetta.“