Leiðindaveður gengur nú yfir landið sem hefur orsakað tafir á flugi frá Keflavíkurflugvelli. Á heimasíðu flugvallarins kemur fram að Icelandair hafi þurft að seinka fjórtán flugferðum frá Keflavík vegna veður.
Mbl.is segir frá því að nokkrir landgangar hafi verið teknir úr notkun á flugvellinum vegna hvassviðris og staðfestir Guðjón Helgason, upplýsingafulltrúi Isavia, það.
„Við þurftum að taka allar landgöngubrýr úr notkun klukkan tvö í dag vegna vindhraða. Vindhraði fór yfir 50 hnúta og hefur haldist þannig síðan þá,“ segir Guðjón í samtali við miðilinn og bætir við að ellefu Icelandair-vélar og tvær Wizz air vélar bíði í stæði og farþegar í vélunum bíði þess að komast frá borði.
Einn af farþegum sem hefur þurft að bíða er grínarinn og tónlistarmaðurinn Halldór Halldórsson sem tístir um málið:
80 mínútur fastur í flugvél í kef útaf vindi. Guð gefðu mér æðruleysi.
— Halldór Halldórsson (@DNADORI) April 12, 2019
Samkvæmt Veðurstofu Íslands er gul viðvörun í gildi og varað við suðaustanstormi með vindhviðum undir Eyjafjöllum, sem og við Öræfi og Vík og suðaustan stormi og hvössum hviðum við Kjalanes, Hafnarfjall og á Snæfellsnesi.