Stjórnarmaður Tólfunnar vann í Facebook-leik Tólfunnar og Carlsberg – Vísa ásökunum um hagsmunaárekstur á bug
Óhætt er að segja að óánægja ríki eftir að í ljós kom að stjórnarmaður í Tólfunni bar sigur úr býtum í Facebook-leik Carlsberg. Óánægjan beinist meðal annars að þeirri staðreynd að Tólfan og Carlsberg unnu að því saman að kynna leikinn og raunar er í gildi samstarfssamningur milli Tólfunnar og Carlsberg. Þannig var umræddur Facebook-leikur kynntur rækilega á Facebook-síðu Tólfunnar.
Í síðustu viku var það svo tilkynnt að sigurvegarinn, Friðgeir Bergsteinsson, hefði verið dreginn út og vann hann tvo miða á leik Íslands og Ungverjalands í Marseille þann 18. júní næstkomandi. Þá fær hann að auki stund með manni leiksins að leik loknum. Friðgeir hefur verið áberandi í starfi Tólfunnar, stuðningsmannasveitar íslenska landsliðsins í fótbolta, á undanförnum árum og er hann í dag titlaður ritari stjórnar. Í samtali við DV vísar Friðgeir öllum ásökunum um hagsmunaárekstur eða spillingu á bug.
Carlsberg og Tólfan hafa verið í samstarfi um nokkurt skeið. Þannig blésu Tólfan og Carlsberg til fagnaðar á Spot í febrúar síðastliðnum í tilefni þess að nýr samstarfssamningur var undirritaður á milli Tólfunnar og Ölgerðarinnar sem sér um framleiðslu og sölu á Carlsberg.
„Carlsberg mun styðja við bakið á Tólfunni í aðdraganda EM í Frakklandi (og áfram) og mun Tólfan launa greiðann til baka með þátttöku í hinum ýmsum uppákomum tengdum Carlsberg. Þá verður Carlsberg lógó áfram framan á treyjum Tólfunnar en Egils Appelsín framan á barnastærðum,“ segir í frétt á heimasíðu Ölgerðarinnar.
Fjörugar umræður hafa spunnist um útdráttinn á Facebook-síðu Carlsberg. „Þetta er til háborinnar skammar og það er vægt til orða tekið. Skelfileg auglýsing og ekki Tólfunni né Carlsberg til framdráttar. Maður verður bara reiður að sjá svona helvítis bull,“ segir einn á meðan annar bætir við:
„Vá, það er þvílík skítalykt af þessum drætti. Carlsberg fær Stjórn Tólfunnar til að auglýsa leikinn og ákveður síðan að verðlauna stjórnarmann Tólfunnar. Talandi um Bananalýðveldið Ísland. Thumbs down Carlsberg.“ Enn annar bætir við: „Ef Tólfan er að sjá um að auglýsa þetta fyrir Carlsberg. Þá á stjórnin að vera útilokuð fra öllum verðlaunum. Þetta lítur virkilega illa út bæði fyrir Carlsberg og Tólfuna.“
Hér má sjá umræðuna á Facebook-síðu Carlsberg
Sem fyrr segir vísar Friðgeir ásökunum um spillingu til föðurhúsanna. Hann hafi einfaldlega skráð sig til leiks og heppnin verið með honum. „Tólfan var ekki tengd leiknum,“ segir Friðgeir í samtali við blaðamann. Hann segir Tólfuna hafa auglýst leikinn fyrir Ölgerðina, en bætir við að þátttaka í leiknum hafi verið dræm. Hann tekur fram í samtali við blaðamann að hann hafi keypt miða á alla leiki keppninnar, en það muni koma í ljós hvað hann geri við vinninginn.
Atli Þór Hergeirsson, vörumerkjastjóri hjá Ölgerðinni, segir að leikurinn hafi fyrst og fremst verið hugsaður fyrir meðlimi Tólfunnar. Hugmyndin hans var þannig að leikurinn átti að kynna endurnýjun samstarfs Tólfunnar og Ölgerðarinnar.
„Ég held að þetta sé innbyrðiságreiningur hjá þeim,“ segir Atli sem vísar í að fyrrverandi stjórnarmeðlimir hafi haft sig í frammi í athugasemdakerfinu á Facebook-síðu Carlsberg.
„Ég þurfti að eyða út nokkrum kommentum á facebook þar sem umræðan var komin út á svo miklar villigötur,“ segir Atli. „Það er leiðinlegt fyrir vörumerki Carlsberg að vera bendlað við svona,“ segir hann að lokum og vísar því á bug að eitthvað óeðlilegt hafi verið við það að stjórnarmaður Tólfunnar hafi unnið í umræddum leik.
