Magni Böðvar Þorvaldsson hefur setið í haldi lögreglunnar í Jacksonville í Flórída í tíu daga grunaður um morð. Frá þessu er greint í ítarlegu viðtali Stundarinnar við Söru, unnustu Magna.

Í frétt Stundarinnar segir að málið sé fjögurra ára gamalt og er Magni í haldi grunaður um að hafa myrt 43 ára gamla konu að nafni Sherry Prather en hún sást síðast yfirgefa bar ásamt Magna, þann 12. október árið 2012. Mánuði síðar fundust líkamsleifar hennar en grunur leikur á að hún hafi verið myrt með skotvopni. Magni hefur alla tíð síðan haldið fram sakleysi sínu en hann var yfirheyrður fljótlega eftir að lík Sherry fannst.

Tveir einstaklingar hafa sagt að Magni hafi játað að hafa myrt Sherry, fyrrverandi eiginkona hans og vinur hennar en það gerðu þau með fjögurra ára millibili. Í viðtali við Stundina segir Sara að um sé að ræða hefndaraðgerð og að unnusti hennar sé saklaus. Þetta snúist allt um peninga en þrjú þúsund dollarar eru í boði fyrir þann sem veitir upplýsingar sem leiðir málið til lykta. Sara segir:

„Hann er einn hjartahlýjasti maður sem ég hef kynnst, er góður við þá sem minna mega sín og elskar börn sín fimm meira en allt annað í þessum heimi. Ég vona að sannleikurinn komi í ljós en það er við ofurefli að etja því yfirvöld hafa nú þegar sagt að hann sé sekur um morðið.“

Í frétt á First coast news segir að Magni hafi neitað að hafa myrt Sherry. Magna kemur fyrir dómara þann 12. desember næstkomandi en honum er neitað um að ganga laus gegn tryggingu fram að þeim tíma.

Hér má lesa viðtal við Söru unnustu Magna.