Glæný stikla er lent úr kvikmyndinni Lof mér að falla, þeirri nýjustu úr smiðju leikstjórans Baldvins Z en hann skrifar einnig handrit myndarinnar ásamt Birgi Erni Steinarssyni.
Lof mér að falla fjallar um hina 15 ára gömlu Magneu en líf hennar umturnast þegar hún kynnist hinni átján ára gömlu Stellu. Magnea laðast að hispurslausu lífi Stellu og þróar Magnea sterkar tilfinningar til hennar sem Stella notfærir sér til eigin hagsbóta. Stella leiðir Magneu inn í heim fíkniefna sem hefur alvarlegar afleiðingar fyrir þær báðar. 12 árum síðar liggja leiðir þeirra óvænt saman og verður uppgjör á milli þeirra óumflýjanlegt.
Stikluna má sjá að neðan.
Með aðalhlutverk í Lof mér að falla eru leikkonurnar Elín Sif Halldórsdóttir og Eyrún Björk Jakobsdóttir. Í myndinni fara einnig með hlutverk leikararnir Þorsteinn Bachmann, Kristín Þóra Halldórsdóttir, Lára Jóhanna Jónsdóttir, Haraldur Ari Stefánsson og Halldór Halldórsson.
Myndin verður frumsýnd 7. september.
