Fjölskyldustríð, handtökur, leyndarmál og þöggun er viðfangsefni nýjustu heimildarmyndar kvikmyndagerðarmannsins Helga Felixsonar, Njósnir lygar og fjölskyldubönd. Myndin verður frumsýnd í Bíó Paradís þann 28. janúar næstkomandi, eftir viku.

Í myndinni fjallar Helgi um handtöku afa hans og ömmu á Ísafirði á sjómannadaginn 8. júní 1941. Þeim var kastað í breskt fangelsi grunuð um að hafa skýlt þýskum flóttamanni. „Í einni svipan verða afi minn og amma meintir samverkamenn nasista á Íslandi,“ segir Helgi í stiklu sem birt hefur verið vegna myndarinnar.

Í myndinni er leitað svara við þeim spurningum hvað varð til þess að fólkið var handtekið og hvort atburðurinn gæti tengst flókinni fjölskyldudeilu fyrir vestan.

Eftir að Ísland var hernumið af Bretum í maí 1940 voru Þjóðverjar á Íslandi handteknir. Umræddur flóttamaður, August Lehrmann, fékk veður af því og fór huldu höfði allt þar til hann var handsamaður um ári eftir hernámið.

Í stiklunni er rætt við fólk sem varð vitni að atburðunum nóttina örlagaríku. Stikluna má sjá hér að neðan.

[vimeo 148026726 w=500 h=281]

TRAILER from Felixson on Vimeo.