„Okkar þátttaka í þessari keppni hefur öll farið samkvæmt áætlun en ég vil helst ekki svara neinum spurningum héðan í frá varðandi þetta mál,“ segir Matthías Tryggvi Haraldsson, söngvari Hatara, í samtali við ESC Denmark. Þar tekur hann fram að hljómsveitin geti ómögulega tjáð sig áfram opiðskátt um átökin sem ríkja á milli Ísraels og Palestínu og sé hættusvæði að dansa áfram á þeirri línu.

Þegar Hatari kom fram á fréttamannafundi í Tel Aviv í vikunni var fundinum slitið hið snarasta af ísraelskum fundarstjóra sem sagði að tíminn væri útrunninn. Þetta gerðist í kjölfar þess að Hatari var spurður um afstöðu hljómsveitarinnar til deilna Ísraels og Palestínu. „Við vonum auðvitað að hernámið endi svo fljótt sem verða má og að friður ríki.“ Var það eina sem Matthías náði að segja áður en hljómsveitin varð að yfirgefa sviðið. Þessi afstaða Hatara til stöðu mála í Ísrael og Palestínu og hreinskilni þeirra hefur heldur betur hrært upp í Eurovision þetta árið.

„Við dönsum á mjórri línu, það er enginn vafi um það,“ segja strákarnir í samtali við Eurovision-vefinn Wiwibloggs.

Meðlimir Hatara hafa áður gefið í skyn að ritskoðun hefur verið gegnumgangandi. Þeir segja í samtali við Wiwibloggs að þeir geti ekki svarað því þá verði þeim hent úr keppni. Þegar Klemens er spurður hvort hljómsveitin hafi fundið fyrir ritskoðun frá íraselskum sjónvarpsstöðvum og öðrum miðlum segir Klemens Nikulásson: „Augljóslega væri ég til í að gefa hreinskilið svar og vera sammála þér en þetta er of pólitísk spurning til að svara hreinskilnislega.“