Sé leitað að íslensku klámi á Pornhub, stærstu klámsíðu heims, þá er ein fyrsta niðurstaðan sem kemur upp myndband af fyrirsætunni Ásdísi Rán. Myndbandið var sett inn á síðuna í fyrra og hefur verið horft á það ríflega þrettán þúsund sinnum.

Klámhundar verða þó fyrir vonbrigðum því engin nekt er í myndbandinu og er það raunar fremur saklaust. Um er að ræða tónlistarmyndband búlgarska söngvarans Diamante en Ásdís Rán lék aðalhlutverkið í því.

Myndbandið er frá árinu 2012 en Ásdís Rán sagði þá í viðtali við Vísi að Diamante væri meðal stærstu nafna RnB-tónlistar í Austur-Evrópu. „Þetta er held ég stærsta hlutverkið sem ég hef fengið, það var rosalega skemmtilegt að taka þátt í þessu,“ sagði Ásdís Rán Gunnarsdóttir.

Til gamans má geta að myndband af annarri frægri íslenskri konu kemur fram í leitarniðurstöðu Pornhub, Björk Guðmundsdóttir. Nafn myndbandsins er AMAZING ICELANDIC TEEN TALKING ABOUT HER TV, eða Ótrúlegur íslenskur unglingur talar um sjónvarpið sitt, og sýnir frægt myndband frá níunda áratugnum þar sem Björk tekur í sundur sjónvarpið sitt.