„Ég ætlaði að bjóða gestum heim en þeir komast ekki. Hér verða allar götu lokaðar.” Þetta segir Sigurjón M. Egilsson, ritstjóri Hringbrautar og íbúi í Salahverfi, í viðtali við vefinn eirikurjonsson.is.

Eins og alþjóð væntanlega veit mun poppstjarnan Justin Bieber halda tvenna tónleika í Kórnum, annars vegar á fimmtudag og hins vegar á föstudag. Um 30 þúsund manns munu sækja tónleikana og því er viðbúið að talsverð umferð verði um Kórahverfið þessa daga.

Til að bregðast við þessu verður lokað fyrir umferð í nánasta umhverfi við Kórinn á tónleikadögunum, fyrir aðra en íbúa og ættu flestir íbúa í hverfinu að hafa fengið umferðarpassa sem dreifa átti í vikunni. „Við hjónin erum búin að fá sérstakan bílapassa en fengum bara einn þó tveir bílar séu á heimilinu. Við komumst ekki einu sinni út í búð,” segir Sigurjón í viðtali við Eirík Jónsson.

Með pössunum sem dreift var til íbúa fylgdu nákvæmar leiðbeiningar og kort yfir hjáleiðir, en sjálfur segist Sigurjón hvorki botna upp né niður í því. „Ég hélt kannski að ég gæti farið Elliðavatnsveginn en þar mega engir fara nema fjórir séu í bílnum plús farþegi; 4 + farþegi stendur á kortinu. Hvað þýðir það?,” spyr hann.

Fréttin á Eirikurjonsson.is.

Viðbót klukkan 20.58

Sena hefur sent DV athugasemd vegna þessarar fréttar. Þar segir að ekkert mál sé fyrir íbúa í Kórahverfi og nágrenni að fá eins marga passa og þeir þurfa. Hér má sjá nánar um það.

Þá segir að nokkuð hafi verið um að passar skiluðu sér ekki inn um lúgurnar á mánudag og þriðjudag eins og til stóð. Afgreiðslubás opnaði í morgun klukkan 11 við Kórinn þar sem íbúar geta sótt þá passa sem upp á vantar. Afgreiðslubásinn er í gámi við anddyri Kórsins, fyrir framan skólann. Til að hafa samband við afgreiðslubásinn við Kórinn er hægt að senda tölvupóst á netfangið ibuapassar@gmail.com eða hringja í síma 7863800. Básinn lokaði klukkan 19 í kvöld.

„Við ítrekum að allir íbúar í Kórahverfis munu komast leiðar sinnar. Umferðarpassarnir eru til þess gerðir að auðvelda þeim aðgengi og koma í veg fyrir umferðarteppur. Takmarkanir fara í gang kl. 16:00 á fimmtudag og föstudag og mun skortur á passa ekki hafa nein áhrif fyrr en þar að kemur. Póstdreifingin og Sena Live biðjast velvirðingar á þeim óþægindum sem þetta kann að hafa valdið.“