„Það að hafa menntað sig og lagt á sig nánast blóð, svita og tár til þess að komast í gegnum háskólann og að fá ekki starf í samræmi við menntun, er mjög svekkjandi, segir María Björgvinsdóttir sem útskrifaðist úr meistaranámi í lögfræði í febrúar síðastliðnum. Rétt eins og fjölmargir aðrir nýútskrifaðir hefur henni reynst erfitt að stíga fyrstu skrefin á vinnumarkaðnum þar sem að atvinnurekendur geri oftar en ekki kröfu um nokkurra ára reynslu þegar ráðið er í störf.

Í grein sem birtist á Bleikt segir María að hún hafi ákveðið að mennta sig í von um betri fjárhagslega framtíð, auk þess sem hún vildi eiga meiri möguleika á starfi sem væri áhugavert, krefjandi og skemmtilegt. Hefur hún sótt um fjölda starfa síðan hún sá fyrir endann á náminu, en aðeins fengið tvö atvinnuviðtöl.

„Eiginlega bara eitt viðtal og ein kynning á sjálfri mér. Þar fékk ég fimm mínútur og átti að selja þeim að ég ætti að fá starfið, ásamt 93 öðrum sem sóttu um sömu stöðu. Ég hef sótt um öll auglýst störf þar sem óskað er eftir lögfræðingi og einnig sótt um fullt af öðrum störfum.

María tekur fram að í hennar geira yfirleitt sé farið fram á 3 til 5 ára starfsreynslu, sem gerir það nær ómögulegt fyrir nýútskrifað fólk að afla sér nauðsynlegrar reynslu og klífa upp metorðastigann.

„Ég veit um marga háskólamenntaða einstaklinga sem eru hreinlega á atvinnuleysisskrá, einhverjir hafa farið í fyrra starf og fyrir nám og sumir komnir í starf alveg ótengt námi, hreinlega til að ná endum samann. Því ekki lifir maður á loftinu einu,“

ritar María jafnframt og bætir við að það væri óskandi fyrir einstaklinga í hennar stöðu að fá tækifæri til þess að sýna sig og sanna á vinnumarkaðnum.

Pistil Maríu má lesa í heild sinni á Bleikt