„Þetta er ógeðslegt og sýnir bara að það er greinilega lítið verið að fræða fólk um þetta,“ segir Rebekka Rán Haraldsdóttir, móðir hins 7 mánaða gamla Flóka Hrafns, en hún segir að viðbrögð fólks eftir að hún birti ljósmynd á Snapchat reikningi sínum á dögunum hafi komið henni í opna skjöldu. Á myndinni mátti sjá hana gefa syni sínum brjóst.

Ekki voru allir jákvæðir í garð ljósmyndarinnar en margir fordæmdu myndbirtinguna. Þá segist Rebekka einnig hafa fengið óviðeigandi skilaboð frá karlmönnum sem settu brjóstagjöfina í kynferðislegt samhengi.

Fáfræði og fordómar

Í samtali við DV.is segir Rebekka að hún hafi síst af öllu búist við svo heiftarlegum viðbrögðum en þau sýni ef til vill þá fáfræði og fordóma sem ríkji hjá mörgum í garð mjólkandi mæðra. „Ég tók myndina og birti snapchattinu mínu því mér fannst svo fyndið og krúttlegt þegar strákurinn minn skreið upp að mér og dró bolinn niður og fékk sér að drekka. Fyrir mér er þetta svo eðlilegur hlutur þannig að mér var bara brugðið við að sjá hvað voru margir að líta illa á þetta og dæma mig fyrir þetta,“ segir hún en meðal athugasemda sem hún fékk að heyra var: „Djöfull ertu klikkuð að deila þessu á snapchat“ og „Vá þú ert rugluð að setja þetta hér inn.“

Var brugðið

Þá segir Rebekka að sér hafi brugðið þegar hún las athugasemdir frá karlkyns notendum sem hafi verið afar óviðeigandi. „Þeir voru að gefa í skyn að þetta væri kynæsandi eða voru jafnvel að láta eins og þeir vissu ekkert um hvað brjóstagjöf snérist eins og þetta væri eitthvað kynlífstengt,“ segir hún og nefnir sem dæmi skilaboð á borð við: „Úúú, og ætlaru bara að leyfa honum að sjúga brjóstin þín?“

Hún segist hafa hugleitt að fjarlægja myndina en látið kyrrt liggja. „Ég veit ekki hvað fær fólk til þess að setja þetta í þetta samhengi,“ segir hún jafnframt en hún vakti einnig athygli á málinu í færslu á Facebook á dögunum þar sem hún birti umrædda mynd og meðfylgjandi texta:

„Það sem er að gerast á þessari mynd er eðlilegur náttúrulegur hlutur sem kallast brjóstagjöf. Bara svona að benda á það þar sem sumir greinilega vita ekkert um hvað þessi mynd snýst. Þannig er að ég póstaði þessari mynd á Snapchat story hjá mér um daginn og svo fékk ég haug af skilaboðum um hvað ég væri klikkuð og rugluð því ég ákvað að deila mynd af brjóstagjöf með barninu minu á Snapchat.“

„Vil bara benda á það að þetta er náttúrulegur hlutur og þetta er það sem bjóstin á mannslíkamanum eru sköpuð fyrir. Ég vil líka benda á það að þar sem barnið er að drekka sést ekkert í geirvötuna. Ef þér finnst þetta óviðeigandi eða kynæsandi mynd þarftu að fara að leita þér hjálpar. Ef þið getið samþykkt hálfnaktar fyrirsætur getið þið líka samþykkt brjóstagjöf.“